Афрадызіяк

афрадызіяк

Падкляса ад	стымулятар
Прычына	афрадызія
Процілегла	анафрадызіяк

Афрадызія́к (грэц. ἀφροδισιακός — любоўны, ад імя ст.-гр. багіні каханьня Афрадыты) — рэчывы, лекавыя сродкі або харчовыя прадукты, якія падвышаюць патэнцыю, спрыяюць сэксуальнай функцыі.

Да харчовых крыніцаў афрадызіякаў адносяць ежу з высокай харчовай каштоўнасьцю, багатую на вітаміны і мікраэлемэнты, якія паляпшаюць абмен рэчываў і дапамагаюць хутка аднавіць сілы. Таксама адпаведнае харчаваньне зьмяшчае падобныя да плоцевых гармонаў фэрмэнты або рэчывы, якія спрыяюць выпрацоўцы такіх гармонаў, што выклікае эўфарыю і разьнявольвае плоцевую цягу. Прыкладамі афрадызіякаў у харчаваньні служаць:

• насеньне гарбуза — запавольвае павелічэньне карэньніцы;
• хрэн — зьмяшчае расьлінны антыбіётык;
• грыбы — аднаўляюць сілы;
• яйкі — спрыяюць мужчынскай патэнцыі;
• пятрушка, цыбуля, часнок і сэльдэрэй — умацоўваюць імунітэт;
• кветкавы мёд — аднаўляе плоцевыя сілы;
• расткі пшаніцы — умацоўваюць жыцьцёвыя сілы;
• пчалінае малачко — аднаўляе тонус;
• ікра — зьмяшчае багата вітамінаў і мікраэлемэнтаў;
• лімоньнік, элеўтэракок і жэньшэнь — узмацняюць абмен рэчываў і павялічваюць прыток крыві да плоцевых органаў;
• шакаляд — павышае настрой;
• імбір — валодае ўзбуджальным уплывам;
• аліўкавы алей — зьмяшчае багата незаменных тлустых кісьляў і вітамінаў;
• насеньне і алей кунжуту — умацоўвае арганізм;
• мігдалы і фісташкі — багатыя на бялок і мікраэлемэнты;
• мускатны гарэх — павышае плоцевую цягу;
• фінікі — павялічваюць колькасьць народкаў;
• зялёная і перцавая мята — аказвае ўзбуджальнае дзеяньне;
• бананы з грэцкімі гарэхамі;
• ёхімбэ — узмацняе эрэкцыю;
• крэвэткі, вустрыцы і мідыі — зьмяшчаюць шмат мікраэлемэнтаў.