Баркэмп
Баркэ́мп (ад ангельскага BarCamp) — фармат канфэрэнцыі, якая ладзіцца ўсімі ейнымі ўдзельнікамі. У адрозьненьне ад традыцыйных канфэрэнцыяў, дзе за падрыхтоўку адказная арганізацыйная група, якая таксама й адбірае матэрыялы да выступаў, арганізацыйная група Баркэмпу складаецца з саміх удзельнікаў ды застаецца адкрытай: да яе можа далучыцца кожны, хто хацеў бы дапамагчы. Канфэрэнцыі ладзяцца ў фармаце выступаў, прэзэнтацыяў, трэнінґаў, абмеркаваньняў. Увесь матэрыял прапануецца самімі ўдзельнікамі й загадзя не ўхваляецца: калі прэзэнтацыя нецікавая, то слухачы заўжды могуць абраць іншую на свой густ зь сьпісу паралельных. Почасту галоўнымі тэмамі зьяўляюцца: новыя мэдыі, сацыяльныя сеткі, блоґі, Ўэб 2.0, стартапы, open source ды іншыя тэмы, зьнітаваныя зь Сецівам ды тэхналёгіямі.
Гісторыя зьявы[рэдагаваць | рэдагаваць крыніцу]
Назва «Баркэмп» пайшла ад мерапрыемства, якое ладзіў Тым О’Рэйлі для сваіх сяброў — Foobar. Першы Баркэмп адбыўся ў Пала Альпа, Каліфорнія, 19—21 жніўня 2005 году ў офісе кампаніі Socialtext. Ад канцэпцыі да імпрэзы, якую наведалі каля 200 чалавек, мінуў адзін тыдзень. Ад таго часу Баркэмпы адбыліся ў болей за 350 месцах па ўсім сьвеце.
Традыцыя падобнага кшталту канфэрэнцыяў у краінах былога Савецкага Саюзу была запачаткаваная ва Ўкраіне, дзе 13—14 кастрычніка 2007 году адбыўся першы Баркэмп у Кіеве.
Арганізацыя[рэдагаваць | рэдагаваць крыніцу]
Галоўнай асаблівасьцю Баркэмпаў ёсьць самаарганізацыя: нягледзячы на існаваньне ініцыятыўнай групы, якая падае ідэю й пачынае падрыхтоўку, большую частку працы бяруць на сябе менавіта ўдзельнікі. Пры гэтым людзям не абавязкова быць фізычна ў адным і тым самым месцы: каардынацыя дзеяньняў ажыцьцяўляецца праз вэб-бачыну, пабудаваную на рухавіку кшталту Wiki, альбо праз сацыяльныя сеткі. Праз гэты рэсурс абмяркоўваюцца ўсе бягучыя пытаньні што да арганізацыі мерапрыемства. Дапамагчы можа кожны, хто мае жаданьне й магчымасьць.
Колькасьць удзельнікаў абмяжоўваецца толькі памяшканьнем, дзе ладзіцца мерапрыемства. Рэгістравацца на ўдзел пажадана, хаця гэта й ня ёсьць абавязковай вымогай. Умовы правядзеньня розьняцца, але пры выбары месца галоўным крытэрам ёсьць наяўнасьць бяздротавага падлучэньня да Сеціва.
Вонкавыя спасылкі[рэдагаваць | рэдагаваць крыніцу]
Баркэмпы ў Беларусі[рэдагаваць | рэдагаваць крыніцу]
- Баркэмпы, што ладзіліся ў Беларусі да першага беларускага Кэмпу
- Байнэту патрэбны Баркэмп!
- ByCamp у Менску — фотасправаздача
- Bycamp 2008. Гэта ByCamp, першы ў сваім родзе ў Беларусі!
Баркэмпы ва Ўкраіне[рэдагаваць | рэдагаваць крыніцу]
- Blogcamp CEE 2008 — усходнеэўрапейскі Баркэмп 17-19 кастрычніка 2008 года ў Кіеве
- BlogCamp CIS and Baltics — першы Баркэмп ва Ўсходняй Эўропе
- Ґуґл-група кіеўскіх баркэмпэраў