Іў Сэн Ларан

Іў Сэн Ларан
Yves Saint Laurent
Іў Сэн Ларан(1976)
Род дзейнасьці	мода
Дата нараджэньня	1 жніўня 1936
Месца нараджэньня	Аран, Альжыр
Дата сьмерці	1 чэрвеня 2008
Месца сьмерці	Парыж, Францыя

Іў Сэн Лара́н (па-француску: Yves Saint Laurent; 1 жніўня 1936, Аран, Альжыр — 1 чэрвеня 2008, Парыж) — францускі мадэльер, які панаваў у сьвеце высокай моды у 1960-я і 1970-я гады. Пасьля сьмерці Крысьціяна Дыёра, у якога Іў пачынаў асыстэнтам, у 1957 годзе устаў на чале яго мадэльнага дому (яму быў 21 год). Увёў у жаночую моду элемэнты мужчынскага гардэроба — скураныя пінжакі, боты па бядро й нават смокінгі (1966). Лічыцца заснавальнікам стылю ўнісэкс. Быў першым, хто запрасіў цёмнаскурых мадэляў для ўдзелу ў паказах мод сваіх калекцыяў.

Біяграфія

У 1953 годзе прыехаў у Парыж, вучыўся на курсах маляваньня «ад-куцюр». З 1955 па 1957 год, па запрашэньні Крысьціяна Дыёра, працаваў яго асыстэнтам. Пасьля нечаканай сьмерці Дыёра, стаў мастацкім дырэктарам фірмы «Дыёр». У 1958 годзе выпусьціў сваю першую калекцыю «Трапэцыя», якая заслужыла трыюмф. У тым жа годзе быў закліканы на ваенную службу і адпраўлены на фронт у Афрыку; праз 20 дзён зь ім здарыўся нэрвовы зрыў і Сэн Ларан быў дэмабілізаваны; праходзіў лячэньне ў псыхіятрычнай клініцы, дзе яго лячылі электрашокам.

У 1961 годзе заснаваў, разам са сваім сябрам П’ерам Бэржэ, які ўгаварыў амэрыканскага мільярдэра Марка Робісана зрабіць фундуш у некалькі мільёнаў франкаў, мадэльны дом «Yves Saint Laurent», каротка «YSL». Першая калекцыя новага дома моды выйшла ў 1962 годзе. У 1964 годзе выпусьціў свае першыя парфума «Y» ад Сэн Ларана. Калекцыя 1965 году была створаная па матывах жывапісу Мандрыана. Калекцыя 1966 году прапанавала ўпершыню ў сьвеце моды смокінг для жанчын, які стаў своеасаблівай маркай дома моды Сэн Ларана. У 1971 годзе пазаваў голым для рэклямнай фатаграфіі сваёй новай парфумы для мужчын. У 1977 годзе выпусьціў парфуму «Опіюм», які карыстаецца сусьветным посьпехам. У 1983 годзе стаў першым мадэльерам, якому пры жыцьці была прысьвечаная выстава ў нью-ёрскім музэі Мэтрапалітэн. У 1985 годзе атрымаў Оскара высокай моды за сваю шматгадовую працу. Канчаткова адышоў ад справаў у студзені 2002 году.

1 чэрвеня 2008 году, ва ўзросьце 72 гадоў, сканаў у сваёй парыскай хаце пасьля працяглай хваробы. Пахаваньне, якое было прызначанае на 6 чэрвеня, было перанесенае на 5-га па просьбе прэзыдэнта Францыі Нікаля Сарказі.

Вонкавыя спасылкі

 Іў Сэн Ларан — сховішча мультымэдыйных матэрыялаў

• Афіцыйны сайт ^(анг.)