Альбрэхт Радзівіл

Альбрэхт Радзівіл
Альбрэхт Радзівіл. Невядомы мастак, XVIII ст.
Герб «Трубы»
Асабістыя зьвесткі
Нарадзіўся:	8 сакавіка 1558
Памёр:	13 чэрвеня 1592
Род:	Радзівілы
Бацькі:	Мікалай Радзівіл «Чорны» Альжбета з Шыдлавецкіх
Жонка:	Ганна з Кетлераў
Дзеці:	Ян Альбрэхт

Альбрэхт Радзівіл (8 сакавіка 1558, Вільня — 13 чэрвеня 1592, Кракаў) — дзяржаўны дзяяч Вялікага Княства Літоўскага. Маршалак надворны літоўскі (1579—1586) і вялікі літоўскі (з 1586).

Валодаў Клецкім і Давыд-Гарадоцкім княствамі, маёнткамі Лебедзева, Хажова, Геранёны і Лаздуны ў Ашмянскім павеце. Ардынат на аліцкі і нясьвіскі, I ардынат клецкі (з 1586). Трымаў Ковенскае староства (з 1579).

Біяграфія

Альбрэхт Радзівіл. З альбома «Выявы роду Радзівілаў». Нясьвіж, 1758

Зь нясьвіскай лініі роду Радзівілаў гербу «Трубы», сын Мікалая «Чорнага» і Альжбеты з Шыдлавецкіх. Меў братоў Станіслава, Юрыя, Мікалая.

Навучаўся ў Ляйпцыскім унівэрсытэце (1570—1573) і ў Рыме (1575—1576). У 1574 годзе ў Вільні перайшоў з кальвінізму ў каталіцтва.

У 1579—1581 удзельнічаў у Інфлянцкай вайне (1558—1582), за ўдзел у вызваленьні Полацку атрымаў пасаду надворнага маршалка.

Браў удзел у складаньні Ям-Запольскага міру (1582). У Клецку збудаваў мураваны касьцёл, фундаваў шпіталь.

Ажаніўся з Ганнай Кетлер, герцагіняй курляндзкай. Меў дачок Ганну, Кацярыну і Барбару; сына Яна Альбрэхта (1591—1626), II ардыната Клецку.

Літаратура

• Вялікае княства Літоўскае: Энцыклапедыя. У 3 т. / рэд. Г. П. Пашкоў і інш. Т. 2: Кадэцкі корпус — Яцкевіч. — Мінск: Беларуская Энцыклапедыя, 2005. — 788 с.: іл. ISBN 985-11-0378-0.
• Энцыклапедыя гісторыі Беларусі. У 6 т. Т. 6. Кн. 1: Пузыны — Усая / Беларус. Энцыкл.; Рэдкал.: Г. П. Пашкоў (галоўны рэд.) і інш.; Маст. Э. Э. Жакевіч. — Мн.: БелЭн, 2001. — 591 с.: іл. ISBN 985-11-0214-8.

Вонкавыя спасылкі

 Альбрэхт Радзівіл — сховішча мультымэдыйных матэрыялаў