Альбрэхт Уладзіслаў Радзівіл

Альбрэхт Уладзіслаў Радзівіл
Альбрэхт Уладзіслаў Радзівіл. З альбома «Выявы роду Радзівілаў». Нясьвіж, 1758
Герб «Трубы»
Асабістыя зьвесткі
Нарадзіўся:	16 чэрвеня 1589
Памёр:	20 ліпеня 1636
Род:	Радзівілы
Бацькі:	Мікалай Радзівіл «Сіротка» Альжбета зь Вішнявецкіх
Жонка:	Ганна з Сапегаў Ганна Соф’я зь Зяновічаў
Дзеці:	ад 2-га шлюбу: Мікалай Францішак, Кацярына, Альжбета Анастасія, Канстацыя Соф’я

Альбрэхт Уладзіслаў Радзівіл (16 чэрвеня 1589, места Нясьвіж — 20 ліпеня 1636, мястэчка Чарнаўчыцы) — дзяржаўны і вайсковы дзяяч Вялікага Княства Літоўскага, мэцэнат. Стольнік (1620—1622) і крайчы вялікі літоўскі (1622—1626), кашталян троцкі і віленскі.

Альбрэхт Уладзіслаў Радзівіл — адзін з найбагацейшых магнатаў Вялікага Княства Літоўскага. Па сьмерці бацькі атрымаў Шыдловец у Каралеўстве Польскім, Чарнаўчыцы ў Берасьцейскім ваяводзтве, Карэлічы і Лахву ў Наваградзкім ваяводзтве. У 1622 купіў Блювенічы ў Берасьцейскім ваяводзтве. Праз шлюб з Ганнай Соф’яй Зяновіч (1628) набыў Глыбокае, Смаргонь, Порплішча і Паставы ў Ашмянскім павеце, Беліцу ў Аршанскім павеце, Ворань у Полацкім ваяводзтве, Прусавічы ў Менскім ваяводзтве. Па сьмерці старэйшага брата Яна Юрыя зрабіўся нясьвіскім ардынатам, трымаў Рыскае (1614—1620), Рускае і Шарашоўскае староствы.

Біяграфія

Зь нясьвіскай лініі роду Радзівілаў гербу «Трубы», сын Мікалая Крыштапа «Сіроткі» і Альжбеты Яўхіміі зь Вішнявецкіх. Меў братоў Яна Юрыя, Жыгімонта Караля і Аляксандра Людвіка.

Навучаўся ў езуіцкіх калегіюмах у Нясьвіжы, Браневе (1599—1601), Аўгсбургу (1604—1606). Цягам 1606—1607 падарожнічаў па Італіі.

3 1609 на чале ўласных аддзелаў удзельнічаў у вайне са Швэцыяй (1600—1629). У вайну з Маскоўскай дзяржавай (1609—1618) узяў удзел у аблозе Пскоўска-Пячэрскага манастыра (1611) і ў выправах на Маскву (1611—1612).

Абіраўся паслом на соймы (1613 і 1615). Пры падтрымцы цесьця, канцлера вялікага Льва Сапегі ў 1620 атрымаў пасаду стольніка вялікага. У 1632 удзельнічаў у абраньні каралём і вялікім князем Ўладзіслава Вазы, які ў 1633 прызначыў яго кашталянам віленскім.

Разбудаваў замак у Шыдлоўцы. Апекваўся пашырэньнем галерэі партрэтаў у Нясьвіжы.

Першы шлюб з Ганнай Сапегай быў бязьдзетным, у другім шлюбе з Ганнай Соф’яй Зяновіч меў сына Мікалая Францішка, а таксама дачок Кацярыну, Альжбету Анастасію і Канстацыю Соф’ю.

Літаратура

• Вялікае княства Літоўскае: Энцыклапедыя. У 3 т. / рэд. Г. П. Пашкоў і інш. Т. 2: Кадэцкі корпус — Яцкевіч. — Мінск: Беларуская Энцыклапедыя, 2005. — 788 с.: іл. ISBN 985-11-0378-0.
• К. Я. Шышыгіна-Патоцкая. Нясвіж і Радзівілы. Мн.: Беларусь, 2007. — 240 с.: іл. ІSBN 978-985-01-0740-4.

Вонкавыя спасылкі

 Альбрэхт Уладзіслаў Радзівіл — сховішча мультымэдыйных матэрыялаў