Аляксандар Мядзьведзь

Аляксандар Мядзьведзь
Дата нараджэньня	16.9.1937
Месца нараджэньня	Белая Царква, УССР

Алякса́ндар Васі́льевіч Мядзьве́дзь (16 верасьня 1937, места Белая Царква, УССР) — выбітны беларускі барацьбіт вольнага стылю, заслужаны майстар спорту (1962), заслужаны дзеяч фізычнай культуры Беларусі (1969). Прафэсар (1976).

Спартовую кар’еру распачаў у 1959 на II Спартакіядзе народаў СССР, дзе заваяваў бронзавы мэдаль.

Аляксандар Мядзведзь — трохразовы алімпійскі чэмпіён (1964, 1968, 1972), прычым у трох розных вагавых катэгорыях (паўцяжкай, цяжкай і абсалютнай), 7 разоў (1962—1963, 1966—1967, 1969—1971) быў чэмпіёнам сьвету, 4 разы (1966, 1968, 1971 і 1972) — чэмпіёнам Эўропы.

У 1961 скончыў школу трэнэраў пры Беларускім дзяржаўным інстытуце фізычнай культуры, а ў 1965 — гэты інстытут.

Па заканчэньні спартовай кар’еры працаваў дацэнтам у Менскам радыётэхнічным інстытуце і трэнэрам па барацьбе.

У 2001 вызнаны лепшым спартоўцам Беларусі XX стагодзьдзя. У 2005 быў вызнаны лепшым вольным барацьбітом у гісторыі спорту і ўведзены ў Залю спартовай славы барацьбы.

Жанаты, двое дзяцей — дачка і сын Аляксей (барацьбіт, уладальнік Кубка Сьвету), тры ўнукі.

З 1970 у Беларусі праводзіцца традыцыйны міжнародны турнір па вольнай барацьбе на прызы Аляксандра Мядзьведзя (катэгорыя Гран-пры).

Узнагароды

• Ордэн МАК і прыз «За высакароднасьць у спорце» (1975)
• Заслужаны майстар спорту (1962)
• Заслужаны трэнэр БССР (1979)
• Заслужаны трэнэр СССР (1984)
• Ганаровы грамадзянін Менску (1975)

Літаратура

• Мядзведзь Аляксандр Васілевіч // Беларуская энцыклапедыя: У 18 т. Т. 11: Мугір — Паліклініка / Рэдкал.: Г. П. Пашкоў і інш. — Мн.: БелЭн., 2000. — 560 с.: іл. ISBN 985-11-0188-5 (т. 11), ISBN 985-11-0035-8. С. 66.

Вонкавыя спасылкі

• 16 верасня — 70 год з дня нараджэння (1937) А. В. Мядзведзя, спартсмена і трэнера (вольная барацьба) // Нацыянальная бібліятэка Беларусі
• Аляксандр Мядзведзь // belarus.by
• Валянціна Лецка. Мядзьведзевы падарожжы // Наша Ніва, 2002