Валерыя Навадворская

Валерыя Навадворская
Валерыя Навадворская
Асабістыя зьвесткі:
Нарадзілася:	17 траўня 1950 (63 гады) Баранавічы, БССР
Партыя:	Дэмакратычны зьвяз

Вале́рыя Ільлі́нічна Навадво́рская (нарадзілася 17 траўня 1950, Баранавічы, БССР) — расейская палітычная дзяячка, дысыдэнт, журналіст, заснавальнік і старшыня ультра-лібэральнай партыі «Дэмакратычны зьвяз» (Старшыня ЦКС ДЗ). Калумніст часопіса The New Times.

Біяграфія

Нарадзілася ў горадзе Баранавічы (БССР).

Прадзед Валерыі Навадворскай быў прафэсійным рэвалюцыянэрам, арганізаваў першую сацыял-дэмакратычную друкарню ў Смаленску. Дзед нарадзіўся ў сыбірскім астрозе, ваяваў у Першым Конным войскі Сямёна Будзёнага.

У дзяцінстве Навадворская моцна хварэла астмай, шмат лячылася ў санаторыях.

У 1968 годзе скончыла сярэднюю школу. Затым вучылася ў інстытуце замежных моваў ім. Морыса Торэза (францускае аддзяленьне) па спэцыяльнасьці «перакладнік і пэдагог».

Годам пазьней арганізавала падпольную студэнцкую групу, у якой абмяркоўвалася неабходнасьць зьвяржэньня камуністычнага рэжыму шляхам узброенага паўстаньня.

У сьнежні 1969 году арыштаваная КДБ па абвінавачваньні ў антысавецкай агітацыі і прапагандзе (арт. 70 УК РСФСР) за распаўсюджваньне ўлётак з крытыкай уводу савецкіх войскаў у Чэхаславаччыну (асуджаная не была).

З чэрвеня 1970 па лютым 1972 знаходзілася на прымусовым лячэньні ў спэцлякарнях з дыягназам «шызафрэнія, паранаідальнае разьвіцьцё асобы».

У 1972 годзе ўдзельнічала ў тыражаваньні і распаўсюджваньні самвыду.

• З 1973 па 1975 год — працавала пэдагогам у дзіцячым санаторыі.
• З 1975 па 1990 год — працавала перакладніцай мэдыцынскай літаратуры 2-га Маскоўскага мэдыцынскага інстытута.
• З 1977 па 1978 год — прадпрымала спробы стварыць падпольную палітычную партыю для барацьбы з КПСС.
• У 1977 годзе скончыла вячэрні факультэт замежных моваў Маскоўскага абласнога пэдагагічнага інстытута ім. Крупскай.
• 28 кастрычніка 1978 году — адна з заснавальнікаў «Вольнага міжпрафэсійнага аб'яднаньня працаўнікоў» (ВМАП). Падвяргалася неаднаразовым і сыстэматычным перасьледам улад: зьмяшчалася ў псыхіятрычныя лякарні, сыстэматычна выклікалася на допыты па справах сяброў ВМАП, у яе на кватэры праводзіліся пяротрусы.
• У 1978, 1985, 1986 гадах — Навадворскую судзілі за дысыдэнцкую дзейнасьць.
• З 1984 па 1986 — зьблізілася з сябрамі пацыфістской групы «Давер».
• З 1987 па травень 1991 была арганізатарам несанкцыянаваных уладамі антысавецкіх мітынгаў і дэманстрацый у Маскве, завошта затрымоўвалася міліцыяй і падвяргалася адміністрацыйным арыштам у агульнай колькасьці 17 раз.
• 1988 год — адна з удзельніц стварэньня партыі «Дэмакратычны Зьвяз» (ДЗ).
• У верасьні 1990 году — вінавацілася ў публічнай абразе гонару і вартасьці прэзыдэнта СССР і ў абразе дзяржаўнага сьцягу.
• У траўні 1991, студзені і жніўні 1995 году супраць Навадворскай узбуджаліся крымінальныя справы, спыненыя за адсутнасьцю складу злачынства.
• Лета 1992 году — прэзыдэнт Грузіі Зьвіяд Гамсахурдзія падаў Навадворскай грузінскае грамадзянства (адначасова прызначыўшы яе сваім дараднікам па правах чалавека).
• У канцы 1992 году — Навадворская і частка сяброў ДЗ стварылі арганізацыю «Дэмакратычны зьвяз Расеі» (ДЗР).
• У верасьні 1993 году — пасьля ўказу прэзыдэнта Барыса Ельцына аб роспуску Вярхоўнай Рады РФ была адной зь першых, хто падтрымаў гэты ўказ. Арганізоўвала мітынгі ў падтрымку прэзыдэнта.
• У кастрычніку 1993 году — удзельнічала ва ўстаноўчым зьезьдзе блёка «Выбар Расеі». Зьбіралася балятавацца ў г. Іванава, але не пасьпела сабраць неабходны лік подпісаў.
• 19 сакавіка 1994 году — Краснапрэсьненская пракуратура пачала праверку дзейнасьці Валерыі Навадворскай па артыкулах 71 і 74 УК РФ (прапаганда грамадзянскай вайны і распальваньне міжнацыянальнай розьні).
• У чэрвені 1994 году — удзельнічала ва ўстаноўчым зьезьдзе партыі «Дэмакратычны Выбар Расеі».
• 27 студзеня 1995 году — Генэральнай пракуратурай РФ было ўзбуджанае крымінальная справа (N229120) з-за артыкулаў Навадворскай, апублікаваных у газэце «Новы погляд». 8 жніўня 1995 г. пракуратурай Цэнтральнай акругі Масквы справа была спынена за адсутнасьцю ў яе дзеяньнях складу злачынства.
• 14 жніўня 1995 году — Маскоўская гарадзкая пракуратура ўзбудзіла чарговую крымінальную справу супраць Навадворскай. Падставай паслужыла ўлётка напісаная Навадворскай да пікету ДЗР 8 красавіка. Справа было перададзена ў Астанкінскую пракуратуру, якая не знайшла ва ўлётцы складу злачынства.
• У сьнежні 1995 году — на выбарах у Дзярждуму Расеі другога скліканьня Навадворская ўвайшла ў выбарчы сьпіс Партыі эканамічнай свабоды. Акрамя гэтага, Навадворская зарэгістравалася ў аднамандатнай акрузе № 192 г. Масквы. Выбары прайграла.
• 11 сакавіка 1996 году — Маскоўская гарадзкая пракуратура адмяніла рашэньне пракуратуры Цэнтральнай акругі Масквы ад 8 жніўня 1995 г. аб спыненьні справы (N229120) у стаўленьні Навадворскай. Справа была накіраваная для паўторнага расьсьледаваньня ў пракуратуру Паўночна-Ўсходняй акругі Масквы.
• 10 красавіка 1996 году — Валерыі Навадворскай было прад'яўлена абвінавачваньне па артыкуле 74, часткі 1-й (наўмысныя дзеяньні, накіраваныя на распальваньне нацыянальнай розьні). Перад выбарамі прэзыдэнта РФ падтрымлівала кандыдатуру Рыгора Яўлінскага. Пасьля першага тура выбараў, разам з Дэмакратычным зьвязам Расеі, прапанавала лідэру «Яблыка» «неадкладна і без усякіх умоў аддаць галасы сваіх прыхільнікаў Барысу Ельцыну».
• 22 кастрычніка 1996 году — Маскоўскі гарадзкі суд адправіў на дасьледаваньне справу N229120 у стаўленьні Валерыі Навадворскай.
• Памагаты дэпутата Канстантына Баравога ў Дзяржаўнай Думе Расеі другога скліканьня (1995—1999).

У цяперашні час займаецца журналісцкай і асьветніцкай дзейнасьцю. Аўтар кніг «Над прорвай у хлусьні», «Мой Карфаген абавязаны быць разбураны» (курс лекцый, прачытаны некалькі разоў у РГГУ у Юрыя Афанасьева), «Па тым боку адчаю».

Вольна валодае ангельскай і францускай мовамі. Чытае на лацінскай, нямецкай, старажытнагрэцкай, італьянскай мовах.

У цяперашні час жыве ў Маскве.

Вонкавыя спасылкі

 Валерыя Навадворская — сховішча мультымэдыйных матэрыялаў

• Новодворская: СССР внес незначительный вклад в борьбу с фашизмом^(рас.)

Аб Валерыі Навадворскай

• Афіцыйная біяграфія Валерыі Навадворскай^(рас.)
• Падрабязная біяграфія^(рас.)
• Біяграфія Навадворскай на сайце www.sem40.ru^(рас.)
• Крытыка Навадворскай і праваабарончага руху^(рас.)
• Старонка папулярнага расейскага блога dirty.ru, прысьвечаная Валерыі Навадворскай^(рас.)

Інтэрв'ю, кнігі й артыкулы Валерыі Навадворскай

• Валерия Новодворская. По ту сторону отчаяния^(рас.)
• Валерия Новодворская. Над пропастью во лжи^(рас.)
• Мой Карфаген обязан быть разрушен^(рас.)
• Валерия Новодворская отвечает на вопросы^(рас.)
• Валерия Новодворская: 95 % избирателей — это инфузории туфельки^(рас.)