Германішкі

Германішкі
Касьцёл Найсьвяцейшай Тройцы
Вобласьць:	Гарадзенская
Раён:	Воранаўскі
Сельсавет:	Воранаўскі
Геаграфічныя каардынаты:	54°7′36″ пн. ш. 25°21′25″ у. д.
Германішкі на мапе Беларусі Германішкі
Галерэя здымкаў у Wikimedia Commons

Германі́шкі — вёска ў Беларусі, на рацэ Жыжма. Уваходзяць у склад Воранаўскага сельсавету Воранаўскага раёну Гарадзенскай вобласьці. Насельніцтва 372 чал. (2001). Знаходзяцца за 4 км на ўсход ад Воранава.

Германішкі — даўняе мястэчка гістарычнай Ашмяншчыны (частка Віленшчыны).

Гісторыя

Першы пісьмовы ўспамін пра Германішкі датуецца 1387, калі вялікі князь Ягайла перадаў іх разам зь іншымі паселішчамі касьцёлу Сьвятых Станіслава і Ўладзіслава ў Вільні. Каля 1452 тут утварылася парафія віленскага біскупства.

Касьцёл, здымак пач. XX ст.

У 2-й палове XVI ст. Ян Осьцік выдаў прывілей на заснаваньне тут мястэчка, таргоў і корчмаў. Згодна з адміністрацыйна-тэрытарыяльнай рэформай (1565—1566) Германішкі ўвайшлі ў склад Ашмянскага павету Віленскага ваяводзтва. У 1686 біскуп віленскі Бжастоўскі збудаваў тут касьцёл Найсьв. Тройцы.

У XVIII ст. Германішкі былі сталовым маёнткам віленскага біскупства. У 1790 маёнтак і мястэчка знаходзіліся ў валоданьні біскупа Ігнацію Якубу Масальскаму. Забудова сядзібы складалася з жылога дома, гаспадарчых збудаваньняў (кухня, лядоўня, бровар, вазоўня і інш.), існавалі млын і 2 гароды. У мястэчку працавала карчма.

У выніку трэцяга падзелу Рэчы Паспалітай (1795) Германішкі апынуліся ў складзе Расейскай імпэрыі, у Ашмянски павеце Віленскай губэрні. У 1886 у мястэчку дзейнічаў касьцёл, працаваў заезны двор.

У Першую сусьветную вайну мястэчка занялі нямецкія войскі. У 1919—1920 у Германішкі ўваходзілі польскія войскі, бальшавікі. У 1920 мястэчка апынулася ў складзе Сярэдняй Літвы, у 1922 — у складзе міжваеннай Польскай Рэспублікі, у Ашмянскім павеце Віленскага ваяводзтва.

У 1939 Германішкі ўвайшлі ў БССР, статус паселішча панізілі да вёскі.

Насельніцтва

• XVIII стагодзьдзе: 1790 — 94 чал., 24 двары.
• XIX стагодзьдзе: 1866 — 182 чал.
• XX стагодзьдзе: 1901 — каля 190 чал.
• XXI стагодзьдзе: 2001 — 372 чал.

Турыстычная інфармацыя

Касьцёл, алтар

Выдатныя мясьціны

• Касьцёл Найсьв. Тройцы (1886—1909)
• Могілкі хрысьціянскія, брама
• Сядзіба (XIX ст.)

Страчаная спадчына

• Палац (XIX ст.)

Літаратура

• Энцыклапедыя гісторыі Беларусі. У 6 т. Т. 2: Беліцк — Гімн / Беларус. Энцыкл.; Рэдкал.: Б. І. Сачанка (гал. рэд.) і інш.; Маст. Э. Э. Жакевіч. — Мн.: БелЭн, 1994. — 537 с., [8] к.: іл. ISBN 5-85700-142-0.
• Hermaniszki (3) // Słownik geograficzny Królestwa Polskiego i innych krajów słowiańskich. Tom III: Haag — Kępy. — Warszawa, 1882. S. 61.

Вонкавыя спасылкі

 Германішкі — сховішча мультымэдыйных матэрыялаў

Германішкі ў сучасным адміністрацыйна-тэрытарыяльным падзеле Беларусі