Джэймз Прэскат Джоўль

Джэймз Прэскат Джоўль
James Prescott Joule
Нарадзіўся	24 сьнежня 1818 Сэлфорд, Ланкашыр, Ангельшчына
Памёр	11 кастрычніка 1889 Сэйл, Чэшыр, Ангельшчына
Грамадзянства	Вялікабрытанія
Навуковая сфэра	Фізыка
Вядомы як	яго імем названа адзінка энэргіі.
Узнагароды і прэміі	Залаты мэдаль Каралеўскага таварыства (1852), мэдаль Коплі (1866), Мэдаль Альбэрта (1880)

Джэймз Прэскат Джоўль (па-ангельску: James Prescott Joule; 24 сьнежня 1818, Сэлфорд, Ланкашыр, Ангельшчына — 11 кастрычніка 1889, Сэйл, Чэшыр, Ангельшчына) — ангельскі фізык, броварнік. Джоўль вывучаў прыроду цяпла й выявіў ейную сувязь з мэханічнай працай. Гэта прывяло да тэорыі захаваньня энэргіі, што ў сваю чаргу прывяло да распрацоўцы першага закона тэрмадынамікі. У гонар Джоўля была названа адзінка вымярэньня энэргіі — джоўль. Ён працаваў разаам з лордам Кельвіным над абсалютнай шкалой тэмпэратуры, рабіў назіраньні над магнітастрыкцыей, вынайшаў сувязь паміж токам, які працякае праз праваднік з вызначаным супрацівам і вылучаным пры гэтым цяплом, якую пазьней назвалі законам Джоўля.

Біяграфія

Да пятнаццаці гадоў Джэймз Джоўль выхоўваўся ў сям'і заможнага бровара; потым працаваў на заводзе, вывучаючы пры гэтым матэматыку, фізыку й хімію пад кіраўніцтвам Джона Дальтона. Першыя працы Джэймза, якія адносяцца да 1838—1840 гадоў, датычацца дасьледваньня законаў электрамагнітызму.

Вышукваючы лепшыя спосабы вымярэньня электрычных токаў, Джоўль у 1841 годзе вынайшаў названы ягоным імём закон, які даваў залежнасьць паміж сілай тока й вылучаным гэтым токам у правадніке цяплом (Закон Джоўля—Ленца). Вывучаючы цеплавыя дзеяньні токаў, Джэймз у 1843 годзе прыйшоў да высновы, што існуе прадбачаная Юліюсам Маерам залежнасьць паміж працай і колькасьцю вылучанага ёю цяпла й знайшоў лікавыя адносіны паміж гэтымі велічынямі — мэханічны эквівалент цяпла.

Зьехаўшы ў 1843 годзе ў Манчэстэр, Джоўль дасьледуе тое ж самае пытаньне, а ў 1847 годзе дакладвае аб ім на пасяджэньні Брытанскай асацыяцыі ў Оксфардзе. У 1854 годзе Джэймз прадае пакінуты яму завод бацькі й скупчаецца толькі на навукі. Працуючы ў тым жа напрамку, навукоўца да сваёй сьмерці апублікаваў 97 навуковых працаў, зь якіх каля 20 зроблены разам з Ўільямам Томсанам і Лаянам Плэфэрам; большасьць зь іх тычацца прыстасаваньню мэханічнай тэорыі цяпла да тэорыі газаў, малекулярнай фізыцы й акустыцы й належацб клясычным працам па фізыцы.

Джэймз Джоўль зьяўляўся чальцом Лёнданскага каралеўскага таварыства й доктарам права Эдынбурскага й Лейдэнскага ўнівэрсытэтаў, двойчы ўзнагароджаны мэдалём Каралеўскага таварыства; у 1878 годзе яму была прызначана ўрадам пажыцьцёвая пэнсія ў 215 фунтаў. У 1872 і 1877 гадох Джоўль быў абраны прэзыдэнтам Брытанскай асацыяцыі па распаўсюджваньню навуковых ведаў.

Вонкавыя спасылкі

 Джэймз Прэскат Джоўль — сховішча мультымэдыйных матэрыялаў

• Джэймз Прэскат Джоўль ^(рас.)