Ежы Папялушка

Ксёндз Ежы Папялушка

Ежы Папялушка (па-польску: Jerzy Popiełuszko; 14 верасьня 1947 году ў Акопах у гміне Сухаволя ў Падляскім ваяводзтве — 19 кастрычніка 1984 году каля Влоцлаўка) — польскі каталіцкі сьвятар, зьвязаны з «Салідарнасьцю», капэлян працоўных, быў забіты функцыянэрамі Службы Бясьпекі (СБ). Благаслаўлёны.

Біяграфія

Нарадзіўся у 1947 годзе, скончыў духоўную сэмінарыю ў Варшаве. У 1972 годзе быў высьвечаны ў сьвятары кардыналам Стэфанам Вышынскiм. У час забастовак у 1980 годзе займаўся пастырскай дзейнасьцю сярод працаўнікоў Варшавы (літургія падчас страйку ў Гуце Варшава).

Лічыўся адным з духоўных пастыраў арганізацыі «Салiдарнасьць». Публічна крытыкаваў камуністычную ўладу, адкрыта выступаў у абарону правоў чалавека і захаваньня ідэалаў «Салідарнасьці» (літургіі за Бацькаўшчыну ў парафіі сьв. Станіслава Косткі ў Варшаве падчас ваеннага становішча). 19 кастрычніка 1984 году ксёндз Папялушка быў выкрадзены функцыянэрамі СБ, жорстка закатаваны і ўтоплены ў Вісьле.

Яго магіла знаходзіцца ля касьцёла сьв. Станіслава Косткі ў варшаўскім раёне Жалібож.

Памяць

Працэс бэатыфікацыі ксяндза Папялушкі афіцыйна пачаўся 8 лютага 1997 году ў касьцёле сьв. Станіслава Косткі, а дыяцэзіяльны этап працэсу скончыўся дакладна чатыры гады пазьней. Затым з 3 траўня 2001 году пачалася праца Кангрэгацыі Кананізаваных, якая ў 2002 годзе выдала пастанову пра сапраўднасьць працэсу. 19 сьнежня 2009 году быў аб'яўлены дэкрэт рымскага папы Бэнэдыкта XVI пра яго пакутніцтва . Бэатыфікацыю вызначылі на 6 чэрвеня 2010 году ў Варшаве.

Фільмы пра Папялушку зьнялі: ў 1988 годзе Агнешка Голанд — «To Kill a Priest» («Забіць сьвятара») і у 2009 годзе Рафал Вечынскі — «Popiełuszko. Wolność jest w nas» («Папялушка. Свабода ёсьць у нас»).

13 кастрычніка 2009 году быў узнагароджаны Ордэнам Белага Арла .

Літаратура

• Milena Kindziuk, Ksiądz Jerzy Popiełuszko. Axel Springer, ISBN 978-83-7558-255-0.

Вонкавыя спасылкі

• Партал інфармацыйны Інстытуту Нацыянальнай Памяці ^{(анг.) (пол.)}