Зыгмунт Вольскі

Зыгмунт Вольскі (?—?) — лясьнічы, першы рэдактар газэты «Наша Ніва».

Зыгмунд Вольскі быў лясьнічым, зьнятым з пасады расейскімі ўладамі за вызнаньне каталіцкае веры і праз гэта моцна пакрыўджаны на ўладу. Ім кіравала жаданьне закласьці даходнае прадпрыемства, а з тае прычыны, што забароненая «Наша Доля» мела вялікую папулярнасьць, Вольскі згадзіўся выдаваць беларускую газэту. Але хутка зразумеў, што не атрымае прыбытку ад «нявыгаднага прадпрыемства».

Напачатку ў перадавіцы «Нашай Нівы» было напісана, што «мы будзем служыць усяму беларускаму працоўнаму народу». Але супраць гэтага выступілі Кучэўскі і Вольскі. Голас адказнага рэдактара і ўласьніка выдавецтва, пераважыў: перадавіцу перапарвілі, і слова «працоўнаму» зьмянілі на «скрыўджанаму». Маўляў, трэба паказаць уладзе, што газэта стаіць не на клясавым грунце, а на агульнанацыянальным.