Лесастэп

Дэвінскі лесастэп, Славаччына

Лесастэ́п — пераходная прыродная зона Паўночнага паўшар’я паміж зонамі мяшаных лясоў ды стэпу.

У Эўразіі лесастэп распасьціраецца суцэльнай паласой з захаду на ўсход ад усходніх прадгор'яў Карпат да Алтаю.

Акрамя таго, ўчасткі лесастэпу знаходзяцца ў межах Сярэднедунайскай раўніны, шэрагу межгорных западзінаў Паўднёвае Сібіры, ў Манголіі ды на Далёкім Усходзе, а таксама займаюць частку раўніны Суньляо на паўночным усходзе Кітаю.

У Паўночнай Амэрыцы лесастэп распасьціраецца з поўначы на поўдзень, праз Вялікія раўніны, да 38° пн. ш. У Паўднёвым паўшар’і лесастэп адсутнічае.

Расьлінны сьвет

Лесастэп на карціне Івана Шышкіна «Жыта»

Для лесастэпу характэрнае складанае чаргаваньне на водападзелах масіваў ліставых лясоў (радзей хваёвых лясоў) з участкамі разнатраўных стэпаў.

У Эўропе ды на эўрапейскае раўніне тыповымі зьяўляюцца сьветлыя шырокалістыя лясы з дубу (дубровы), бука, ліпы, каштана, ясеня ды іншых. У Сібіры распаўсюджаныя выспавыя дробналістыя бярозава-асінавыя колкі. Да лесастэпаў адносяцца таксама ў Паўночнае Амэрыцы прэрыі, у Афрыцы ды Аўстраліі — саваны.

Жывёльны сьвет

У лесастэпе няма асаблівых, уласных толькі яму відаў жывёлаў. Стэпавыя віды (суслік, сурок, драфа ды іншыя) спалучаюцца і суіснуюць з тыпова ляснымі прадстаўнікамі (вавёрка, куніца, лось).