Перамяненьне Панскае

Зьвесткі зь Вікіпэдыі — вольнай энцыкляпэдыі
Перайсьці да: навігацыі, пошуку

Праабражэ́ньне — летняе сьвята, якое адзначаецца 6 жніўня:

Праваслаўная традыцыя[рэдагаваць | рэдагаваць крыніцу]

Праабражэньне, 1648 г. Маларыцкі майстар.

Сьвята Ператварэньня Гасподняга зьвязана з наступнай эвангельскай падзеяй. Незадоўга да Сваіх пакутаў Ісус Хрыстос узяў трох бліжэйшых вучняў — Пятра, Іакава і Іаана і ўзышоў зь імі памаліцца на высокую Фаворскую гару. Зрабіў Ён гэта дзеля таго, каб раскрыць ім Сваю Божую славутасьць і падтрымаць у іх веру, калі ўбачаць яны зь цягам часу Ягоныя пакуты. Пакуль Збавіцель маліўся, вучні, стаміўшыся, паснулі. Калі ж яны прачнуліся, то ўбачылі Хрыста ператвораным: твар Ягоны зьзяў, як сонца, а вопратка стала белая й зіхатлівая. У гэты час зьявіліся да яго два прарокі, Майсей і Ільля, і гутарылі зь ім аб пакутах і сьмерці, якія Яму належыла зазнаць у Ерусаліме. Раптам сьветлае воблака агарнула вучняў, і яны пачулі голас Бога Айца: «Гэта Сын мой Любы, у Якім Маё благаваленьне. Яго слухайце!» (Мф. 17:5). Вучні ў страху кінуліся долу, Ісус Хрыстос падышоў да іх і сказаў: «Устаньце і ня бойцеся», пасьля чаго яны ўбачылі Яго ў звычайным выглядзе. Сыходзячы з гары, Ісус Хрыстос загадаў вучням не расказваць аб тым, што яны бачылі, да часу Яго ўваскрэсеньня зь мёртвых. Сьвята гэтае ў народзе называецца «Другім Спасам», ці «Спасам Яблычным», бо ў гэты дзень у храмы прыносяць для асьвячэньня яблыкі і іншую садавіну новага ўраджаю.

Ніжэй пададзеныя сьвяточныя сьпевы ў рэдакцыі Біблейскае Камісіі БПЦ.

Трапар сьвята Праабражэньня Гасподняга, глас 7[рэдагаваць | рэдагаваць крыніцу]

Праабразіўся Ты на гары,Хрысьце Божа,
паказаўшы вучням Тваім славу Тваю, наколькі было ім магчыма.
Няхай і нам, грэшным, зазьзяе сьвятло Тваё вечнае,
па малітвах Багародзіцы, Сьвятладаўца, слава Табе.

Кандак сьвята Праабражэньня Гасподняга, глас 7[рэдагаваць | рэдагаваць крыніцу]

На гары праабразіўся Ты,
і вучні Твае бачылі славу Тваю, Хрысьце́ Божа, наколькі маглі ўспрыня́ць яе,
каб, убачыўшы Цябе расьпінаемага,
зразумелі, што мукі Твае дабравольныя,
і сьвету прапаведалі,
што Ты сапраўды ёсьць Ойчае зьзяньне.

Задастойнік сьвята Праабражэньня Гасподняга[рэдагаваць | рэдагаваць крыніцу]

Велічай, душа мая, Госпада, які праабразіўся на Фаворы. Нараджэньне зь Цябе было цнатлівым: Бог выйшаў з Твайго ўлоньня, зьявіўся на зямлі ў плоці і жыў зь людзьмі. Таму Цябе, Багародзіца, мы ўсе велічаем.

Каталіцкая традыцыя[рэдагаваць | рэдагаваць крыніцу]

У Каталіцкім касьцёле сьвята ўсталяванае ў 1456 годзе папам Калістам ІІІ у гонар перамогі хрысьціянскай (праваслаўна-каталіцкай) кааліцыі над туркамі пад Бялградам у 1456 годзе. У сучасным каталіцкім календары сьвяту надаецца меншае значэньне, але яно шырока сьвяткуецца ў праваслаўнай (19 жніўня) і армянскай цэрквах (Праабражэньне або Спас).

Вонкавыя спасылкі[рэдагаваць | рэдагаваць крыніцу]

Commons-logo.svg  Перамяненьне Панскаесховішча мультымэдыйных матэрыялаў