Спартовае арыентаваньне

Міжнародны сымбаль спартовага арыентаваньня. Выкарыстоўваецца для абазначэньня кантрольнага пункта.

Спартовае арыентаваньне — від спорту, у якім спартсмэны, выкарыстоўваючы буйнамаштабную мапу і компас, павінныя прайсьці вызначаную колькасьць кантрольных пунктаў (КП), разьмешчаных на мясцовасьці, а прамежкавыя вынікі вызначаюцца па часу праходжаньня дыстанцыі.

На мясцовасьці кантрольныя пункты абазначаюцца бела-чырвонымі прызмамі памеру 30×30 см, як на летніх, так і на зімовых спаборніцтвах. Кожны кантрольны пункт мае абазначэньне, якое складаецца з двухзначных лічбаў, пачынаючы з 31. Кантрольныя пункты забясьпечваюць сродкамі адзнакі (электронныя чыпы, кампостэры), якія замацоўваюць непасрэдна над прызмай.

Мэта спаборніцтваў — як мага хутчэй прайсьці дыстанцыю паводле дакладна вызначанага і пазначанага на мапе парадку. Праводзяцца спаборніцтвы ў зададзеным накірунку і па выбары (зададзеную колькасьць кантрольных пунктаў спартсмэн праходзіць ў любой пасьлядоўнасьці).

Вылучаюцца наступныя віды арыентаваньня:

• бягом (спартовае арыентаваньне бягом)
• на лыжах (спартовае арыентаваньне на лыжах)
• на роварах (спартовае арыентаваньне на роварах)
• пешшу і на калясках (спартовае арыентаваньне па сьцежках — спаборніцтвы для спартсмэнаў-інвалідаў)

Адрозьніваюцца наступныя віды арыентаваньня:

• арыентаваньне ў зададзеным накірунку
• арыентаваньне па маркіраванай трасе
• арыентаваньне па выбары
• арыентаваньне па сьцежках
• рагейн

Таксама адрозьніваюць спаборніцтвы па іншых крытэрах:

• па часе дня (дзённыя, начныя)
• па спосабе ўдзелу спартсмэнаў (індывідуальныя, эстафэтныя)
• па спосабе арганізацыі старту (асобны, гандыкап, агульны)

Арыентаваньне па выбары — праходжаньне зададзенай колькасьці кантрольных пунктаў зь ліку ўстаноўленых у раёне спаборніцтваў. Выбар кантрольных пунктаў і парадак іх праходжаньня вызначаюцца самім удзельнікам. Неаднаразовы выхад на адзін і той жа кантрольны пункт залічваецца толькі адзін раз. Старт можа быць агульным ці групавым.

У Беларусі спартовае арыентаваньне разьвіваецца з 1964 году.

Чэмпіянат сьвету па спартовае арыентаваньню пачаў праводзіцца з 1966 году.

Глядзіце таксама

• Беларуская фэдэрацыя арыентаваньня
• Компас
• Мапа

Вонкавыя спасылкі

 Спартовае арыентаваньне — сховішча мультымэдыйных матэрыялаў

• Міжнародная фэдэрацыя спартовага арыентаваньня (IOF)^(анг.)
• Беларуская фэдэрацыя арыентаваньня (БФА)^(рас.)
• Клюб арыентаваньня БДУ^(рас.)
• Пра арыентаваньне ў Беларусі^(рас.)