Сямён Багданаў

Сямён Ільліч Багданаў
Семён Ильич Богданов
29 жніўня 1894 — 12 сакавіка 1960
Месца нараджэньня	Санкт-Пецярбург, Расейская імпэрыя
Месца сьмерці	Масква, РСФСР, СССР
Прыналежнасьць	Расейская імпэрыя РСФСР СССР
Род войскаў	Танкавыя войскі
Гады службы	Расейская імпэрыя (1915—1918) СССР (1918—1956)
Званьне	Маршал
Бітвы/войны	Грамадзянская вайна ў Расеі Польска-бальшавіцкая вайна Вялікая Айчынная вайна
Узнагароды	Мэдаль XX гадоў Рабоча-Сялянскай Чырвонай Арміі Мэдаль За перамогу над Нямеччынай у Вялікай Айчыннай вайне 1941—1945 гг.

Сямён Ільлі́ч Багда́наў (29 жніўня [ст. ст. 17 жніўня] 1894, Санкт-Пецярбург — 12 сакавіка 1960, Масква) — савецкі вайсковы дзяяч, маршал бронетанкавых войскаў (1945), двойчы Герой Савецкага Саюзу.

Жыцьцяпіс

Расеец. Удзельнік Першай сусьветнай вайны, у 1917 скончыў Гатчынскую школу падпаручнікаў. У Чырвонай Арміі з 1918 року, удзельнічаў у Грамадзянскай вайне, бальшавіцка-польскай вайне (1919—1921) і дзеяньнях супраць атраду Антонава.

Скончыў маскоўскую Вышэйшую ваенна-пэдагагічную школу (1923), курсы «Стрэл» (1930), акадэмічныя курсы ўдасканаленьня пры Ваеннай акадэміі мэханізацыі і матарызацыі РСЧА (1936). Да Вялікай Айчыннай вайны прайшоў шлях ад камандзіра ўзводу да камандзіра брыгады.

З 1938 року па кастрычнік 1939 знаходзіўся пад сьледзтвам. Быў асуджаны на два рокі ўвязьненьня, аднак неўзабаве вызвалены па амністыі. У 1942 судзімасьць зьнятая, прыняты ў ВКП(б).

У пачатку вайны зь Нямеччынай на чале танкавай дывізіі супрацьстаяў уварваньню на заходніх рубяжох Беларусі, зладзіў пад Пружанамі контаратаку. 21 ліпеня 1942 атрымаў званьне генэрал-маёра. Зь верасьня 1943 — камандоўца 2-й гвардзейскай танкавай арміяй. Войскі пад камандаваньнем С. І. Багданава удзельнічалі ў баёх на Заходнім, 1-м і 2-м Украінскіх і 1-м Беларускім франтох, змагаліся з нацыстамі у бітве пад Масквой, у Корсунь-Шаўчэнкаўскай, Уманска-Баташанскай, Люблінска-Берасьцейскай, Вісла-Одэрскай, Усходне-Памяранска і Бэрлінскай апэрацыях.

За ўмелае даводзтва войскамі танкавай арміі ў баёх пры прарыве абароны суперніка на ўманскім накірунку і праяўленае пры гэтым мужнасьць і адвагу С. І. Багданаву нададзенае званьне Героя Савецкага Саюзу. За ўзорныя дзеяньні войскаў пад ягоным камандаваньнем па акружэньні і разгроме варшаўскай групоўкі суперніка, пры фарсіраваньні рэк Нетцэ і Одэр і пры выхадзе да ўзьбярэжжа Балтыйскага мора ўзнагароджаны другім мэдалём «Залатая Зорка».

Пасьля вайны камандаваў бронетанкавымі і мэханізаванымі войскамі групы савецкіх акупацыйных войскаў у Нямеччыне, са жніўня 1947 року першы намесьнік камандоўцы бронетанкавымі і мэханізаванымі войскамі ВС СССР, са сьнежня 1948 — камандоўца бронетанкавымі і мэханізаванымі войскамі ВС СССР. У красавіка 1953 року прызначаны камандоўцам 7-й мэханізаванай арміі, ад траўня 1954 — начальнік бронетанкавай акадэміі імя Сталіна. У 1956 року звольнены з шэрагаў Узброеных Сілаў па стане здароўя.

Дэпутат Вярхоўнага Савету СССР 2—4-га скліканьняў. Памёр 12 сакавіка 1960. Пахаваны на Новадзявочых могілках.

Узнагароды

• Мэдаль «Залатая Зорка» Героя Савецкага Саюзу № 2545 (11.03.1944)
• Мэдаль «Залатая Зорка» Героя Савецкага Саюзу № 5658 (06.04.1945)
• 2 ордэны Леніна
• 4 ордэны Чырвонага Сьцягу
• ордэн Суворава I-й ступені
• ордэн Суворава II-й ступені
• Замежныя ордэны
• Мэдалі

Памяць

• Бронзавы бюст у Санкт-Пецярбургу.
• Вуліца Багданава ў Маскве.
• Вуліца Багданава ў Пружанах.
• Вуліца Багданава ў Севастопалі.

Літаратура

• Багданаў Сямён Ільіч // Беларуская энцыклапедыя: У 18 т. Т. 2. — Мн., 1996 — С. 203
• Богданов Семён Ильич (29.8.1894—12.3.1960) // Их именами названы…: Энцикл. справочник. — Мн.: БелСЭ, 1987. — С. 77. — 30 000 ас.
• Богданов Семён Ильич // Навечно в сердце народном: Справочник / Шамякин, И. П. — 3-е издание, дополненное и исправленное. — Мн.: БелСЭ, 1984. — С. 61. — 65 000 ас.
• Памяць: Гіст.-дакум. хроніка Пружан. р-на / Беларус. Энцыкл.; Рэдкал. І. П. Шамякін (гал. рэд.) і інш.; Маст. А. М. Хількевіч. — Мн.: БелЭн, 1992. ISBN 5-85700-094-7. — С. 209.

Вонкавыя спасылкі

• «Герои страны»^(рас.)