Уладзімер Каткоўскі
Зьвесткі зь Вікіпэдыі — вольнай энцыкляпэдыі.
| Уладзімер Каткоўскі | |
 |
|
| Дата нараджэньня: | 19 чэрвеня 1976 |
| Месца нараджэньня: |  Менск, БССР |
| Дата сьмерці: | 25 траўня 2007 |
| Месца сьмерці: |  Прага, Чэхія |
Уладзімер Каткоўскі (19 чэрвеня 1976 — 25 траўня 2007) — вядомы беларускі карыстальнік і дзеяч інтэрнэту.
[рэдагаваць] Біяграфія
Нарадзіўся ў Менску, тамсама скончыў школу. У 1993 годзе зьехаў ў ЗША па праграме адукацыйнага абмену «Акт у падтрымку свабоды».
Скончыў Амэрыканскі ўнівэрсытэт у Благаеўградзе (Баўгарыя) па спэцыяльнасьці «інфарматыка». Працаваў кампутаровым спэцыялістам у Будапэшце (Фонд Сораса), пасьля ў Франкфурце-на-Майне. З 2002 працаваў у беларускай рэдакцыі «Радыё Свабода».
16 чэрвеня 2006 разам са сваёй жонкай Ёнадай патрапіў у аўтамабільную катастрофу на вуліцы Прагі. З таго часу знаходзіўся ў глыбокай коме. Памёр 25 траўня 2007, амаль праз год пасьля катастрофы, так і не прыйшоўшы ў прытомнасьць.
[рэдагаваць] Дзейнасьць у інтэрнэце
Уладзімер Каткоўскі быў адным з пачынальнікаў беларускамоўнага інтэрнэту, і яго актыўным і вядомым дзеячом. У канцы 90-ых разам зь Ёнадай ў Баўгарыі стварыў сайт «Літванія, зямля ліцьвінаў». Быў адным з першых беларускамоўных блогераў у LiveJournalе (карыстальнік rydel23), ў далейшым таксама стаў адным з найболей папулярных. За свой блог br23.net атрымаў гран-пры 4-га конкурсу беларускіх кантэнт праектаў, які праводзіўся кампаніяй TUT.BY.
Стварыў і падтрымліваў сайт Pravapis.org, прысьвечаны беларускай мове, сайт «Мартыралёґ Беларусі», які распавядаў пра беларускія ахвяры сталінскіх рэпрэсіяў. Пераклаў на беларускую мову інтэрфэйс вядомага пашукавіка Google, заснаваў Вікіпэдыю на беларускай мове (Удзельнік:Rydel).
Стварыў і адміністраваў апошнюю вэрсію сайта беларускай службы «Радыё Свабода».
Уладзімер Каткоўскі заўсёды актыўна змагаўся за распаўсюд беларускай мовы і аб'ектыўнай інфармацыі пра Беларусь ў інтэрнэце.
