Фрыц Ланг
Зьвесткі зь Вікіпэдыі — вольнай энцыкляпэдыі.
| Фрыц Ланг | |
| Fritz Lang | |
 Ланг у 1930-я |
|
| Імя пры нараджэньні: | Friedrich Christian Anton Lang |
| Дата нараджэньня: | 5 сьнежня 1890 |
| Месца нараджэньня: | Вена, Аўстра-Вугоршчына |
| Дата сьмерці: | 2 жніўня 1976 |
| Месца сьмерці: | Бэвэрлі Хілз, ЗША |
| Прафэсія: | кінарэжысэр, сцэнарыст, прадусар, актор |
| IMDb: | ID 0000485 |
Фрыц Ланг (па-нямецку: Friedrich Christian Anton Lang, нар. 5 сьнежня 1890 года – памёр 2 жніўня 1976 года) – нямецкі сцэнарыст, кінарэжысэр, актор і прадусар аўстрыйскага паходжаньня, заснавальнік нямецкага экспрэсіянізму ў кіно ў міжваенны пэрыяд.
[рэдагаваць] Біяграфія
Нарадзіўся ў 1890 годзе ў Вене ў сям’і архітэктара Антона Ланга. Пасьля аканчаньня пачатковай школы вывучаў архітэктуру ў венскай Вышэйшай Тэхнічнай Школе (з 1907 года), а потым жывапіс у Акадэміі Графічнага Мастацтва ў Вене (з 1908 года) і ў Дзяржаўнай Школе Мастацтва ў Мюнхэне (з 1911 года) ў мастака Юліуса Дзіца, з 1913 да 1914 г.г. вучыцца ў Школе Жывапісу Морыса Дэні і Акадэміі Жульена ў Парыжы.
Пад час Першай Сусьветнай вайны, з 12 студзеня 1915 года Ланг запісаўся дабраахвотнікам на фронт, дзе стаў франтавым афіцэрам аўстра-вугорскага войска. Служыў на італьянскім фронце. Быў паранены чатыры разы і быў сем разоў узнагароджаны.
Пасьля вайны займаўся напісаньнем сцэнараў і быў акторам у кабарэ да моманту, калі ў 1920 годзе не сустрэўся з Эрыхам Помэрам, які запрасіў яго на працу ў Германію.
Ланг лічыцца клясыкам нямецкага нямога кіно, у гісторыю кіно трапіў, перад усім, дзякуючы фільму “Метраполіс”, які быў зьняты ў 1926 годзе. Першым гукавым фільмам Ланга стаў фільм “М” (1931 год). У 1932 годзе на экраны трапіў фільм “Завяшчаньне доктара Мабуса” (Das Testament des Dr. Mabuse) які быў зьняты па сцэнару Ланга і яго жонкі Тэі фон Харбу. Але хутка фільм быў забаронены нацысцкай цэнзурай. Акрамя гэтага Ланг атрымаў прапанову працаваць ў нацысцкім кіно ад Гебельса, нават ня гледзячы на тое, што яго маці была габрэйкай. Адмовіўшыся ад прапановы, Ланг пакінуў Германію і едзе ў Францыю, дзе здымае фільм “Ліліём” (Liliom).
1 чэрвеня 1934 года Ланг падпісаў кантракт са студыяй “Мэтра Гольдвін Маер” і 6 чэрвеня пакідае Эўропу.
У ЗША Ланг працаваў да 1956 года, калі ён вырашыў вярнуцца ў Германію (ФРГ). Пасьляваенная творчасьць Ланга прадстаўлена вэстэрнамі і гангстэрскімі баевікамі.
Фрыц Ланг памёр у Бэвэрлі Хілз 2 жніўня 1976 года.
[рэдагаваць] Вонкавыя спасылкі
Фрыц Ланг — сховішча мультымэдыйных матэрыялаў
