Арлен Кашкурэвіч
Арле́н Міха́йлавіч Кашкурэ́віч (Арсен, нарадзіўся 15 верасьня 1929) — беларускі мастак-графік. Народны мастак Беларусі (1973)[1]. Ляўрэат Дзяржаўнай прэміі Беларусі (1972), Заслужаны дзяяч мастацтваў Рэспублікі Беларусь.
Нарадзіўся 15 верасьня 1929 году ў сям’і службоўца. У Вялікую Айчынную вайну ў эвакуацыі ў Саратаве. У 1953 годзе скончыў Менскую мастацкую вучэльню[2].У 1959 годзе скончыў аддзяленне графікі Беларускага Дзяржаўнага тэатральна-мастацкага інстытуту. Дыплёмная праца — ілюстрацыі да раману ісьляндзкага пісьменьніка Х.Лакснеса «Атамная станцыя». Ад 1959 да 1969 выкладаў у гэтым інстытуце. Сябра Саюзу мастакоў СССР, Беларускага саюзу мастакоў. Працуе ў жанры станковай графікі, афармляе кнігі. Прафэсар-візытатар ЭГУ. Зьяўляецца ўладальнікам дзесяткаў міжнародных і нацыянальных прэмій за кніжнае афармленьне.[3]. Працы экспанаваліся ў шматлікіх краінах сьвету.
Творчасьць
Сярод прац станковай графікі:
- сэрыя «Горад і людзі» (1963—1964)
- сэрыя «Партызаны» (1969—1970)
- сэрыя «Купаліяна» (на аснове вобразаў твораў Янкі Купалы, 1971)
- сэрыя «Блякада» (1979)
- «Прысьвячэньне В. Быкаву» (трыпціх, 1984)
- «Спрадвечнае» (трыпціх, 1984)
- «Напалм» (дыпціх, 1985)
- сэрыя «Асьветнікі» (1989)
- сэрыя «Святыя зямлі Беларускай» (ад 1993)
Ілюстрацыі
- Біблейскія кнігі «Найвышэйшая песьня Саламонава», «Эвангельле паводле Лукі», «Апакаліпсіс»
- Апавяданьне «Курган» Янкі Купалы (1967)
- Раман «Авадзень» Э.Войніч (1968)
- Раман «Каласы пад сярпом тваім» Уладзімера Караткевіча (1968)
- Раман «Дзікае паляваньне караля Стаха» Уладзімера Караткевіча (1983)
- Паэма «Песьня пра зубра» Міколы Гусоўскага (у перакладзе на беларускую мову 1973)
- Драма «Фауст» Гётэ (1976)
Партрэты гістарычных дзеячаў Беларусі (Міндоўга, Жыгімонта Старога ды іншых).
Ілюстрацыі выкананыя ў тэхніцы афорту, лінагравюры ды эстампу. За сэрыі станковых работ «Партызаны» ды «Купаліяна» ў 1972 годзе узнагароджаны Джяржаўнай прэміяй Беларусі.
Выставы
- 2007 «Разам» (супольная, Менск)
- 2005 «Concerto Grosso» (пэрсанальная, Менск)
- 1987 Графіка А. Кашкурэвіча (пэрсанальная, Полацак)
Асабістае жыцьцё
Жонка Людміла Аляксандраўна Красьнеўская-Кашкурэвіч. Сыны Ігар ды Фёдар таксама сталі мастакамі[4].
Літаратура
- Ганчароў, Мікалай Іванавіч. Арлен Міхайлавіч Кашкурэвіч. : Біягр. нарыс / Рэд. Г. П. Падбярэзскі. — Мн. : Беларусь, 1976. — 64 с.
- Familia: А. Кашкурэвіч, І. Кашкурэвіч, Т. Кашкурэвіч. Жывапіс. Графіка: Каталог. — Мн.: Рэкламэкспарт, 1993. — 24 с.
- Быкаў В. Арлен Кашкурэвіч [аб творчасьці графіка]. — У кн.: Быкаў В. Праўдай адзінай. Літаратурная крытыка, публіцыстыка, інтэрв’ю. Мн., 1984, с. 125—127.
- Караткевіч Уладзімер. Княль і гусьляр. [А. Кашкурэвіч]. // Маладосьць 1969, №8, с.113.
- Да юбілею мастака А. М. Кашкурэвіча / К. Дз. Варанько // Мастацкая адукацыя і культура: 2004. — № 4. — С. 15-16
- Іван Шамякін. Мой сааўтар - мастак: [Аб ілюстрацыях А. Кашкурэвіча да рамана «Сэрца на далоні»] // Літаратура і мастацтва. 11 жніўня 1964.
- Алена Киселевич. Артыкул пра выставу Арлена Кашкурэвіча на euramost.org (рас.)
- Інтэрвію Арлена Кашкурэвіча Сяргею Харэўскаму.//Наша Ніва, №42/2004
Крыніцы
- ^ Беларуская энцыклапедыя: У 18 т. Т. 8. Мн.: Бел. Эн, 1999. — 576 с ISBN 985-11-0144-3
- ^ Пётра Василеўскі. Urbi et orbi — гораду і сьвету. // Дзеяслоў №3(16),2005
- ^ Артыкул «Ісландскі след у творчасці Арлена Кашкурэвіча» у Блогу Дзьмітра і Юлі Гурневічаў
- ^ Барыс Крэпак. «Складаны просты сьвет» Арлена Кашкурэвіча. БДГ. 13 верасьня 1999.
Гэта — накід артыкула пра мастацтва. Вы можаце дапамагчы Вікіпэдыі, пашырыўшы яго. |