Бітва пад Саўле
Бітва пад Саўле адбылася 22 верасьня 1236 року паміж войскам Ордэну мечаносцаў і яго хаўрусьнікамі з аднога боку і войскам жамойтаў і зэмгалаў зь іншага[1]. Апісаная ў Лівонскай старэйшай рыфмаванай хроніцы.
У другой палове лета 1236 року быў арганізаваны першы крыжовы паход на Жамойць[2]. На баку Ордэна мечаносцаў у паходзе бралі ўдзел рыцары з Заходняе Эўропы, хрышчоныя эсты, лівы, латгалы, атрад зь дзьвюхсот пскавічоў, а таксама наўгародзкія ваяры[1].
Бітва адбылася 22 верасьня 1236 року, калі каля мясцовасьці Саўле на крыжакоў, якія вярталіся з паходу, напалі жамойты і зэмгалы. Лякалізацыя Саўле выклікае спрэчкі, звычайна гэта месца атаясамляюць з сучасным горадам Шаўлі ў Летуве. Згодна зь іншай вэрсіяй, бітва адбылася каля латыскай вёскі Вэцсаўле[1].
Цяжкая кавалерыя крыжакоў была вымушаная прыняць бой у балоцістай мясцовасьці, дзе перавага была на баку лёгка ўзброеных жамойтаў і земгалаў. Войска паганцаў, магчыма, узначальвалі Выкінт і Эрдзівіл, згаданыя ў дамове 1219 у якасьці жамойцкіх князёў[2].
Крыжакі пацярпелі цяжкую паразу, у бітве загінулі вялікі магістар Вольквін і 48 рыцараў Ордэну мечаносцаў, а таксама многія зь ліку хаўрусьнікаў Ордэну, сярод якіх 180 пскавічоў[3].
У выніку паразы крыжакоў супраць улады Ордэну мечаносцаў паўсталі куршы, зэмгалы і сэлы[1]. У 1237 року Ордэн быў вымушаны зьліцца з больш пасьпяховым Тэўтонскім ордэнам.
У наш час сьвяткаваньне перамогі ў бітве пад Саўле набыло новы сэнс, павязаны з захаваньнем адметнасьці балцкіх народаў, таму 22 верасьня было абвешчана Днём балцкага адзінства.
-
Меркаванае месца бітвы -
Будаўніцтва мэмарыялу ў гонар перамогі пад Саўле -
Інфармацыйны стэнд -
Рэканструкцыя
Крыніцы[рэдагаваць | рэдагаваць крыніцу]
- ^ а б в г Саўлеская бітва // Вялікае Княства Літоўскае. Энцыклапедыя у 3 т. — Мн.: Беларуская Энцыклапедыя імя П. Броўкі, 2005. — Т. 2: Кадэцкі корпус — Яцкевіч. — С. 554. — 788 с.
- ^ а б Насевіч В. Л. Пакаленне першае: Міндоўг (1230-ыя — 1250-ыя гады) // Пачаткі Вялікага княства Літоўскага: Падзеі і асобы. — Мн., 1993.
- ^ В лѣто 6745 [1237] // Новгородская первая летопись старшего извода.
|
|
Гэты артыкул ня мае шаблёну-карткі. Неабходны шаблён — {{Бітва}}. |
|---|
