Доўгі Брод
Доўгі Брод, Даўгабродзкае прадмесьце — гістарычны раён Менску, разьмешчаны ў заходняй частцы места, на поўдзень ад Вайсковых могілак на старадаўнім Магілёўскім гасьцінцы.
На паўднёвым захадзе ад Доўгага Броду месьціцца Стромкі (Круты) Бераг, на паўночным захадзе — Залатая Горка, на ўсходзе — Сьляпянка, на поўдні — Архірэйская Слабодка.[1][2]
Гісторыя
Назва прадмесьця паходзіць ад броду праз рэчку Сьлепню, што існаваў на старажытным Магілёўскім шляху. У XVIII—XIX стст. у Магілёў пачалі вандраваць па Ігуменскім гасьцінцы, а стары шлях выкарыстоўвася для праезду ў навакольныя вёскі і сядзібы. Пасьля ўзьнікненьня ў пачатку XX ст. урочышча Доўгі Брод (цяпер рог вуліц Батанічнай і Казлова) людзі пачалі сяліцца ўздоўж старой Магілёўскай дарогі. Гэтак утварылася прадмесьце і Даўгабродзкая вуліца.[3]
У пачатку XX ст. Доўгі Брод ўваходзіў у трэцюю паліцэйскую частку места. Праз прадмесьце праходзілі Даўгабродзкая (цяпер Казлова, частка вуліцы захавала гістарычную назву), 2-я Даўгабродзкая (часткова Чапаева), Мар'еўская (захавалася часткова), Берасьцянская (захавалася часткова), Залатагорская (Чырвоназоркавая), Высокая (часткова Платонава), Цьвёрдая (не захавалася) вуліцы.[1][4][5]
Старыя адрасы
- Маркаўскі завулак. Шпалерная фабрыка Фрындлянда. Заснаваная ў 1911 року. Мелася паравая машына магутнасьцю 40 конскіх сілаў, дынама-машына. Будынак фабрыкі разьмяшчаўся на цяперашняй вуліцы Зьмітрака Бядулі.[6]
Сучаснасьць
У цяперашні час пра колішняе прадмесьце нагадвае Даўгабродзкая вуліца (у 1967 року перайменаваная ў гонар Казлова, аднак у 1987 — паўднёвай частцы вуліцы была павернутая гістарычная назва).
Крыніцы
- ^ а б «План губернского города Минска (1903)» з выпраўленьнямі і дадаткамі І. Сацукевіча // Гісторыя Мінска. 1-е выданне. Мінск. БелЭн. 2006. C. 196—197
- ^ «Формирование территории г. Минска (1800 — 2004)» // Гісторыя Мінска. 1-е выданне. Мінск. БелЭн. 2006. C. 550—551
- ^ Гісторыя Мінска. 1-е выданне. Мінск. БелЭн. 2006. С. 226
- ^ Іван Сацукевіч. Тапанімія вуліцы і плошчаў Менска ў ХІХ — пачатку ХХ стст.
- ^ План губернского города Минска (1898) // Шыбека З.В., Шыбека С.Ф. Мінск: Старонкі жыцця дарэв. горада/ Пер. з рускай мовы М.Віжа; Прадмова С.М. Станюты. — Мн.: Полымя, 1994. [1] асобн. арк. карт.
- ^ Шыбека З.В., Шыбека С.Ф. Мінск: Старонкі жыцця дарэв. горада/ Пер. з рускай мовы М.Віжа; Прадмова С.М. Станюты. — Мн.: Полымя, 1994. С. 251—252
Літаратура
- Шыбека З.В., Шыбека С.Ф. Мінск: Старонкі жыцця дарэв. горада/ Пер. з рускай мовы М.Віжа; Прадмова С.М. Станюты. — Мн.: Полымя, 1994. — 341 с. [1] асобн. арк. карт.: іл. ISBN 5-345-00613-X.
- Памяць: Гіст.-дакум. хроніка Мінска. У 4 кн. Кн. 1-я. — Мн.: БЕЛТА, П15 2001. — 576 с.: іл. ISBN 985-6302-33-1.
- Гісторыя Мінска. 1-е выданне. Мінск. БелЭн. 2006. — 696 с. ISBN 985-11-0344-6.
- Іван Сацукевіч. Тапанімія вуліцы і плошчаў Менска ў ХІХ — пачатку ХХ стст.
- Вячеслав Бондаренко. Названия минских улиц за последнее столетие: тенденции, загадки, парадоксы
