Падатак на прыбытак

Зьвесткі зь Вікіпэдыі — вольнай энцыкляпэдыі

Падатак на прыбытак — адзін з асноўных відаў прамых падаткаў.

Займае асноўнае месца па ўдзельнай вазе ў фармаваньні даходаў дзяржаўнага бюджэту. Аб’ектам абкладаньня зьяўляецца сукупны прыбытак арганізацыі, паменшаны ці павялічаны ў адпаведным парадку. Плацельшчыкамі падатку зьяўляюцца ўсе камэрцыйныя прадпрыемствы, а таксама некамэрцыйныя арганізацыі, якія займаюцца прадпрымальніцтвам. Падатак узымаецца паводле падатковае дэклярацыі па прапарцыйных альбо (радзей) прагрэсіўных стаўках.

Беларусь[рэдагаваць | рэдагаваць крыніцу]

Паводле агульнай часткі Падатковага кодэксу Рэспублікі Беларусь 2002 году, падатак на прыбытак ёсьць рэспубліканскім (артыкул 8)[1]. Асаблівая частка Падатковага кодэксу Беларусі 2009 году зьмяшчала главу 14 «Падатак на прыбытак», якая ўлучала артыкулы з 125-га па 144-ы. Паводле 125-га артыкула, «Плацежнікамі падатку на прыбытак прызнаюцца арганізацыі». Згодна са 126-м артыкулам «Аб’ектам падаткаабкладаньня падаткам на прыбытак прызнаюцца валавы прыбытак, а таксама дывідэнды і прыраўнаваныя да іх даходы..., налічаныя беларускімі арганізацыямі»[2].

27 студзеня 2023 году міністар па падатках і зборах Беларусі Сяргей Налівайка паведаміў, што за 2022 год падатак на прыбытак забясьпечыў 15,1 % (звыш 5,5 млрд) з 36,5 млрд рублёў даходу кансалідаванага бюджэту Беларусі[3].

Стаўкі[рэдагаваць | рэдагаваць крыніцу]

Паводле 142-га артыкула асаблівай часткі Падатковага кодэксу Беларусі 2009 году, «Стаўка падатку на прыбытак усталёўвалася ў памеры:

  • 18 %»[4] — ва ўсіх агульных выпадках;
  • 12 % — «па дывідэндах..., а таксама па даходах заснавальнікаў (удзельнікаў, акцыянэраў) у выглядзе курсавых розьніцаў, што ўзьнікаюць пры пераацэнцы дэбіторскай запазычанасьці па разьліках з замежнымі арганізацыямі па належных ад іх дывідэндах»;
  • 10 % — «ад збыту тавараў уласнай вытворчасьці, улучаных у пералік высокатэхналягічных тавараў», што таксама сплочваюць «навукова-тэхналягічныя паркі, цэнтры странсфэру тэхналёгіяў, рэзыдэнты навукова-тэхналягічных паркаў»;
  • 25 % — «банкі і страхавыя арганізацыі»[2].

У 2023 годзе стаўку падатку на прыбытак павысілі з 18 да 20 %.

Крыніцы[рэдагаваць | рэдагаваць крыніцу]

  1. ^ А.Лукашэнка. Падатковы кодэкс Рэспублікі Беларусь ад 19 сьнежня 2002 г. № 166-З (агульная частка) (рас.) // Нацыянальны прававы інтэрнэт-партал Рэспублікі Беларусь, 26 кастрычніка 2016 г. Архіўная копія ад 26 кастрычніка 2016 г. Праверана 4 кастрычніка 2018 г.
  2. ^ а б А.Лукашэнка. Падатковы кодэкс Рэспублікі Беларусь ад 29 сьнежня 2009 г. № 71-З (асаблівая частка) (рас.) // Нацыянальны прававы інтэрнэт-партал Рэспублікі Беларусь, 12 студзеня 2017 г. Праверана 4 кастрычніка 2018 г.
  3. ^ МПЗ: у 2022 годзе ў кансалідаваны бюджэт паступіла больш за 36,5 млрд рублёў // Беларускае тэлеграфнае агенцтва, 27 студзеня 2023 г. Архіўная копія ад 27 студзеня 2023 г. Праверана 27 студзеня 2023 г.
  4. ^ Уладзіслаў Кулецкі. Дзяржава і бізнэс разам шукаюць выйсьце // Зьвязда : газэта. — 27 жніўня 2013. — № 159 (27524). — С. 2. — ISSN 1990-763x.