Камплексны лік

Кампле́ксны лік — пашырэньне мноства рэчаісных лікаў, звычайна абазначаецца як $\mathbb{C}$ . Усякі камплексны лік можа быць прадстаўлены як фармальная сума $x+iy$ , дзе $x$ і $y$ — рэчаісныя лікі, $i$ — уяўная адзінка. Камплексныя лікі ўтвараюць альгебраічна замкнутае поле — гэта азначае, што мнагасклад ступені $n$ з камплекснымі каэфіцыентамі мае $n$ камплексных каранёў (асноўная тэарэма альгебры). Гэта адзін з галоўных чыньнікаў шырокага выкарыстаньня камплексных лікаў у матэматычных дасьледаваньнях. Акрамя таго, выкарыстаньне камплексных лікаў дае магчымасьць зручна й кампактна сфармуляваць шматлікія матэматычныя мадэлі, якія дастасоўваюцца да матэматычнай фізыкі й у прыродазнаўчых навуках, як то электратэхніка, гідрамэханіка, картаграфія, квантавая мэханіка, тэорыя ваганьняў і іншых.