Тар’я Турунэн

Тар'я Турунэн
Тар'я Сойлэ Сузана Турунэн Кабулі
Дата нараджэньня	17 жніўня 1977 (35 гадоў)
Гады творчасьці	1996 - цяперашні час
Краіна	Фінляндыя
Прафэсіі	сьпявачка
Інструмэнты	Вакал, піяніна, барабаны, флейта
Жанры	паўэр-мэтал сымфа-мэтал опэра
Псэўданімы	Тар'я
Гурты	«Nightwish» «Beto Vázquez Infinity»
Супрацоўніцтва	Schiller
Лэйблы	Universal Music Group
http://www.tarjaturunen.com

Та́р'я Со́йлэ Су́зана Ту́рунэн Кабулі (нарадзілася 17 жніўня 1977 году ў Кітэе, Фінляндыя) — сьпявачка і аўтарка песьняў, былая вакалістка фінскага сымфа-мэтал-гурту «Nightwish». Дзякуючы свайму моцнаму лірыка-драматычнаму сапрана Тар'я зьяўляецца адной з найвядомейшых сьпявачак у жанры сымфанічнага мэталу ва ўсёй Эўропе.

Біяграфія

Тар'я займаецца музыкай з шасьці год. У васямнаццацігадовым узросьце яна пераехала ў горад Куопіё дзеля таго, каб займацца ў Акадэміі Сыбэліюса.

У складзе «Nigthwish»

У 1996 на запрашэньне свайго аднаклясьніка Туомаса Халяпайнэна яна стала адной з заснавальніц гурту «Nightwish». У гэтым жа годзе Тар'я выступіла на Саванлінскім опэрным фэсьце. Аднак сусьветную вядомасьць Тар'я атрымала менавіта пасьля другога альбому «Nightwish» пад назвай «Oceanborn» (выйшаў у 1998).

Тар'я Турунэн на канцэрце (2006)

Турунэн выконвала сольныя партыі ў рок-балеце 1999 году «Evankeliumi» (іншая назва «Evangelicum») з гуртом «Waltari» (en) ў Фінскай Нацыянальнай опэры. Яна працягнула выступы з «Nightwish» і прымала ўдзел у запісе альбомаў у 2000 і 2001 гадох, пасьля чаго паступіла ў Музычны Ўнівэрсытэт у Карлсруэ, Германія. У гэты час яна запісвала вакал для альбому «Nightwish» «Century Child» (выпушчаны ў 2002), а таксама для альбому аргентынскага гурту «Beto Vazquez Infinity».

У 2002 годзе Тар'я выступала ў Паўднёвай Амэрыцы з канцэртам «Noche Escandinava» (па-беларуску: Скандынаўская ноч). Пасьля працяглага сусьветнага турнэ «Nightwish» у падтрымку альбому «Century Child», калі гурт узяў адпачынак, Тар'я вярнулася ў Карлсруэ.

У 2003 яна пабралася шлюбам з аргентынскім бізнэсоўцам Марсэла Кабулі.

Фінскі прэзыдэнт Тар'я Халанэн і ейны муж запрасілі Турунэн у прэзыдэнцкі палац у Хельсынкі ў сьнежні 2003 году на сьвяткаваньне Дню незалежнасьці Фінляндыі. Аглядальнікі фінскага тэлеканалу YLE назвалі яе самай уражвальна апранутай спадарыняй на гэтым сьвяце.

Пасьля перапынку Тар'я вярнулася ў «Nightwish» дзеля запісу новага альбому «Once» і ўдзелу ў сусьветным турнэ ў ягоную падтрымку ў 2004-2005 гадох. Увесну 2004 яна таксама ўдзельнічала ў другім турнэ з канцэртам «Noche Escandinava». На каляды 2004 году выйшаў самотнік «Мара аднаго анёла» (па-фінску: «Yhden Enkelin Unelma»), які атрымаў у Фінляндыі статус «залатога». Увесну 2005 Тар'я сьпявала ў дуэце «Leaving You for Me» зь нямецкім выканаўцам Мартынам Кезыцы. Іхні выступ быў выпушчаны таксама і на відэа.

21 кастрычніка 2005 пасьля фінальнага канцэрту сусьветнага туру Туомас Халяпайнэн і іншыя ўдзельнікі «Nightwish» паведамілі Тар'і Турунэн адкрытым лістом, што яна больш не зьяўляецца вакалісткай гурту, абвінаваціўшы яе ў перамене прыярытэтаў і ўзрослых камэрцыйных інтарэсах. Туомас паведаміў, што ў апошнія гады Тар'я не прымала ўдзелу ў творчасьці і рэпэтыцыях гурту, ігнаравала прыхільнікаў, зрывала заплянаваныя канцэрты. Тар'я апублікавала адкрыты адказ на сваёй пэрсанальнай бачыне па-ангельску і па-фінску. У сваім лісьце яна назвала тое, што адбылося, «неабгрунтавана жорсткім». У чэрвені 2006 Тар'яў муж Марсэла Кабулі апублікаваў на афіцыйнай бачыне Тар'і адказы на шматлікія пытаньні заўзятараў, што былі атрыманыя з пачатку году, наконт раздраю між Тар'яй і іншымі ўдзельнікамі гурту.

Сольная кар'ера

У сьнежні 2005 Тар'я дала некалькі калядных канцэртаў у Фінляндыі, Нямеччыне, Гішпаніі і Румыніі. У 2006 годзе яна запісала калядны альбом пад назвай «Подых зь нябёсаў» (па-фінску: «Henkäys Ikuisuudesta») і вакал для дэбютнага альбому свайго брата Тыма Турунэна, а таксама прыняла ўдзел у Саванлінскім опэрным фэсьце.

Першы сольны альбом Тар'і Турунэн, «My Winter Storm», быў выпушчаны ў лістападзе 2007 і ў першы ж дзень атрымаў «залаты» статус у Фінляндыі, а пазьней у Вугоршчыне і Чэхіі. У Фінляндыі быў выпушчаны плятынавы альбом, у Расеі выйшаў залаты. Тар'я прыняла ўдзел у запісе складанкі «Into The Light» ад Nuclear Blast Allstars, выканаўшы разам з гітарыстам Віктарам Смольскім (гурт «Rage» і гуртом «Кипелов») песьню «In the Picture».

Тар'я Турунэн з гуртом на канцэрце ў Аргентыне (2008)

Напрыканцы 2007 Тар'я была вылучаныя на прэміі «ECHO» як лепшы новы выканаўца і «Emma» як лепшая фінская выканаўца. Яна дала згоду стаць гэдляйнэрам першага дню фэсту жаночага вакалу ў мэталёвай музыцы 2008 году ў Wieze, Бэльгія.

9 траўня 2008 канцэртам на ляйпцыгскім фэсьце «Wave-Gotik-Treffen» Тар'я распачала эўрапейскае турнэ ў падтрымку ўласнага альбому «My Winter Storm». У рамках турнэ 4 лістапада Тар'я наведае з выступам і Беларусь.

У ліпені 2008 цераз ейны блог былі анансаваныя дзьве новыя кампазыцыі: «The Crying Moon» для новага альбому і «Enough» ў якасьці бонус-трэку ў перавыданьні «My Winter Storm». Апошняя ўпершыню прагучала ў жніўні гэтага ж году ў ейным туры Storm in América.

10 верасьня 2008 прадстаўнікі гуказапісвальнай кампаніі Spinefarm UK абвесьцілі, што 1 сьнежня плянуецца выхад EP з новым матэрыялам.

Дыскаграфія

У складзе «Nightwish»

• Angels Fall First (1997, Spinefarm)
• Oceanborn (1998, Spinefarm)
• Wishmaster (2000, Spinefarm)
• Over the Hills and Far Away (2001)
• Century Child (2002, Spinefarm)
• Once (2004, Nuclear Blast)
• End of an Era (2005)

З «Beto Vázquez Infinity»

• Beto Vázquez Infinity (2001)

Сольныя праекты

• Yhden Enkelin Unelma (2004)
• You Would Have Loved This (EP) (2006)
• Henkäys Ikuisuudesta (2006)
• I Walk Alone (EP) (2007)
• My Winter Storm (2007)
• Die Alive (EP) (2008)

Вонкавыя спасылкі

 Тар’я Турунэн — сховішча мультымэдыйных матэрыялаў

• Афіцыйная бачына
• Афіцыйная бачына «Nightwish»
• Тар'я Турунэн на MySpace
• Фан-бачына Тар'і^(рас.)
• Бачынка пра Тар'ю Турунэн і Nightwish^(рас.)
• Праект Tarja на Encyclopaedia Metallum