Дамэн верхняга ўзроўню
Зьвесткі зь Вікіпэдыі — вольнай энцыкляпэдыі.
Дамэн верхняга ўзроўню (англ.: top-level domain, скар. TLD) — апошняя частка назвы дамэна, пасьлядоўнасьць літар пасьля апошняй кропкі ў назьве любога дамэна. Так, у назьве дамэна www.website.com, дамэнам верхняга ўзроўню зьяўляецца com (альбо COM, таму што падзелу на вялікія і малыя літары у назвах дамэнаў няма).
Арганізацыя Internet Assigned Numbers Authority (IANA) на сёньняшні дзень падзяляе дамэны верхняга ўзроўню на тры тыпы:
- Нацыянальныя дамэны верхняга ўзроўню (country code top-level domains, ccTLD): ужываюцца ў краінах альбо ў залежных тэрыторыях. Даўжыня — две літары, напрыклад by для Беларусі.
- Агульныя дамэны верхняга ўзроўню (generic top-level domain, gTLD): ужываюцца (па меншай меры тэарытычна) у клясах арганізацый (напрыклад, com для камэрцыйных арганізацый). Даўжыня — звыш трох літар. Большасьць агульных дамэнаў верхняга ўзроўню дазваляецца выкарыстоўваць на любых тэрыторыях сьвету, але па гістарычным прычынам mil (ваенны) і gov (урадавы) могуць ужывацца толькі Злучанымі Штатамі Амэрыкі. Агульныя дамэны верхняга ўзроўню падзяляюцца на субкласавыя спансаваныя дамэны верхняга ўзроўню (sponsored top-level domains, sTLD), напрыклад, .aero, .coop, .museum і неспансаваныя дамэны верхняга ўзроўню (unsponsored top-level domains, uTLD), напрыклад .biz, .info, .name і .pro.
- Інфраструктурныя дамэны верхняга ўзроўню (infrastructure top-level domain).
Поўны сьпіс дамэнаў верхняга ўзроўня зьмешчаны ў наступным артыкуле: сьпіс дамэнаў верхняга ўзроўню.
[рэдагаваць] Гістарычныя дамэны верхняга ўзроўню
Дамэн .nato быў утвораны напрыканцы 1980-х арганізацыяй NIC для НАТО, але праз некаторы час высьветлілася, што ні адзін з такіх дамэнаў не дазваляў адэкватна вызначыць статус міжнародных арганізацый. Таму неўзабаве NIC быў утвораны яшчэ адзін дамэн з назвай .int для ўжываньня міжнароднымі арганізацыямі, прапанаваўшы НАТО выкарыстоўваць замест існуючага варыянта nato.int. Такім чынам, дамэн верхняга ўзроўню nato перастаў выкарыстоўвацца, але канчаткавае яго выдаленьне адбылося толькі ў ліпені 1996 года.
Іншымі гістарычнымі дамэнамі верхняга ўзроўню былі .cs для Чэхаславакіі, .su для Савецкага Саюза і .zr для Заіра.
|
|
Гэта — накід артыкула пра Інтэрнэт. |
|---|
