Гайдэльскія мовы

Гайдэ́льскія (гэ́льскія) мовы складаюць адну з падгрупаў астраўной групы кельцкіх моваў індаэўрапейскай моўнай сям’і. Уключаюць ірляндзкую, шатляндзкую гэльскую ды мэнскую. Цікава, што носьбіты кожнае з трох пералічаных моваў называюць сваю проста «гэльскаю» (ірляндцы — Gaeilge, шатляндцы — Gàidhlig, мэнцы — Ghaelg).

Усе сучасныя гайдэльскія мовы паходзяць ад сярэднеірляндзкае, якая існавала ў 10 — 16 стагодзьдзях, сярэднеірляндзкая — ад стараірляндзкае, а стараірляндзкая, у сваю чаргу, ад першаснае ірляндзкае, вядомае толькі па агамічных надпісах. Ад сярэднеірляндзкае паходзіў таксама галоўэйскі гэльскі дыялект, цяпер мёртвы.