TUT.BY

Зьвесткі зь Вікіпэдыі — вольнай энцыкляпэдыі
Перайсьці да: навігацыі, пошуку
tut.by
URL www.tut.by
Alexa рэйтынг 9 (у Беларусі)
Камэрцыйны? Так
Тып інтэрнэт-партал
Рэгістрацыя неабавязковая
Даступныя мовы беларуская, расейская
Уладальнік УП «Надзейныя праграмы»
Аўтар Сяргей Дзьмітрыеў
Пачатак працы 5 кастрычніка 2000 (13 гадоў таму)

TUT.BY (прамаўляецца як Тут бай) — беларускі партал, які адкрыўся 5 кастрычніка 2000 году. Партал мае пошукавую сыстэму і падае такія сэрвісы, як дайджэст навін, бясплатная электронная пошта, форумы і іншае. Усяго на сайце каля 50 тэматычных падзелаў і сэрвісаў.

Гісторыя[рэдагаваць | рэдагаваць крыніцу]

У пачатку сакавіка 2000 году вядомы кампутарны журналіст Сяргей Дзьмітрыеў напісаў на форуме газэты «Кампутарныя весткі» аб тым, што ў яго ёсьць ідэя стварэньня беларускага інтэрнэт-праекту, якую ён падорыць таму, хто возьмецца яе рэалізаваць. На заклік адгукнуўся кіраўнік прыватнага прадпрыемства «Надзейныя праграмы» Юры Зісер. Са дня іх асабістай сустрэчы 15 сакавіка 2000 году і пачаўся TUT.BY.

Ідэя Сяргея Дзьмітрыева складалася ў стварэньні бясплатнага паштовага сэрвісу для беларусаў, аналягічнага Mail.ru. Да абмеркаваньня праекту былі прыцягнутыя іншыя журналісты газэты «Кампутарныя весткі» — Андрэй Кананавіч і Кірыл Валошын, а таксама праграміст Даніла Рудэнка, які валодаў на той момант досьведам распрацоўкі электронных паштовых сэрвісаў і сайтаў. «Наша мэта — стаць беларускім Yahoo!» — заявіў кіраўнік TUT.BY Юры Зісер. Зьявіўся бізнэс-плян разьвіцьця сэрвісаў TUT.BY да 2005 году.

Распрацоўка парталу пачалася ў ліпені 2000 году, а ўжо 5 кастрычніка 2000 году ён адкрыўся для наведвальнікаў. Першапачаткова новы рэсурс уключаў бясплатную электронную пошту, навіны (уключаючы архіў і анонсы), надвор’е, курсы валют, кошты на паліва і гасьцёўную кнігу. У канцы 2000 году зьявіліся форумы, а таксама сталі аказвацца паслугі платнага хостынгу і інтэрнэт-рэклямы. 17 сакавіка 2004 г. на галоўнай старонцы разьмясьцілі лічыльнік наведвальнікаў «Акавіта»[1].

6 сьнежня 2007 году ў 09:00 TUT.BY запусьціў уласнае інтэрнэт-радыё, што ў студзені 2010 г. ператварылася ў сеціўнае тэлебачаньне[2].

Далей зьявіліся сэрвісы пошуку працы, пошукавы сэрвіс і многія іншыя — усяго звыш за 50. У 2008 годзе — уласная сацыяльная сетка «Я тут!».

У лютым 2009 году на базе беларускага парталу яго ўладальнікі разам з партнэрамі адчынілі аналягічны партал ў КазахстанеNUR.KZ. У сакавіку кампанія абвясьціла аб пераходзе паштовага сэрвісу на плятформу Google Apps[3].

25 чэрвеня 2009 году некаторыя браўзэры (Firefox, Chrome, Safari) і пошукавы сэрвіс Google пачалі выдаваць сваім карыстачам папярэджаньне пра тое, што на навінавых старонках news.tut.by і it.tut.by, а таксама на Форумах TUT.BY можа знаходзіцца небясьпечнае праграмнае забесьпячэньне: «Маецца інфармацыя пра тое, што сайт news.tut.by выкарыстоўваецца для нападаў на кампутары карыстачоў… Сайты, якія атакуюць кампутары, спрабуюць усталяваць праграмнае забесьпячэньне, якое выкрадае пэрсанальную інфармацыю, шкодзіць вашай сыстэме ці выкарыстоўвае ваш кампутар для нападаў на іншыя кампутары». Папярэджаньне заснавана на выніках сканаваньня рэсурсаў пошукавым робатам Google. «У выніку праведзенай праверкі шкоднаснага ПА на навінавых старонках TUT.BY выяўлена не было», — паведаміў тэхнічны дырэктар TUT.BY Дзяніс Атвалка.

На працягу сьнежня 2009 году трывала тэставаньне новага дызайну галоўнае старонкі, і са студзеня новы дызайн быў прыняты, замясьціўшы сабой дызайн, які праіснаваў амаль дзесяцігодзьдзе.[4]

Узнагароды[рэдагаваць | рэдагаваць крыніцу]

  • Усерасейскі інтэрнэт-конкурс «Залаты Сайт 2005» (намінацыя «Замежжа»)
  • Маскоўскі міжнародны фэст рэклямы 2005 (1 месца ў намінацыі «Інтэрнэт: Сайты» катэгорыі «Інфармацыйныя праекты»)
  • Нацыянальная інтэрнэт-прэмія tibo'2005 (намінацыя «Каталёгі і пошукавыя сыстэмы»)
  • Беларускі Інтэрнэт Форум (лепшы інтэрнэт-праект 2002 году)
  • 5-ы Кіеўскі Міжнародны фэст рэклямы 2004 (фіналіст у намінацыі «Інфармацыйныя рэсурсы: СМІ, інфармацыйныя парталы, серверы і агенцтвы»)
  • Усерасейскі інтэрнэт-конкурс «Залаты Сайт 2004»
  • Інтэрнэт-прэмія tibo'2004
  • Акцыя «IT-Leader 2004» — найболей часта згадваныя прадпрыемствы па выніках апытаньняў, праведзеных сярод уладальнікаў ПК і арганізацый
  • Першы Нацыянальны Конкурс у вобласьці разьвіцьця сувязяў з грамадскасьцю «PRемия-2003»
  • Міжнародны фэст-конкурс «Выбар Году 2002»

Бізнэс[рэдагаваць | рэдагаваць крыніцу]

У студзені 2002 году зьявіўся Цэнтар электроннага бізнэсу TUT.BY, мэта якога — аказаньне платных і бясплатных паслуг для беларускіх прадпрыемстваў, арганізацый, устаноў, у першую чаргу распрацоўкі і пасоўваньня сайтаў, кансалтынгу, хостынгу і г. д. З тых часоў TUT.BY адзіны ў двух асобах: Цэнтар электроннага бізнэсу забясьпечвае прыбытковую частку TUT.BY, а беларускі партал TUT.BY застаецца бясплатным для сотняў тысяч беларусаў.

Як і ў большасьці інтэрнэт-парталаў, аснову бізнэсу TUT.BY складае інтэрнэт-рэкляма, якая прыносіць каля 75% прыбытку. На TUT.BY зьяўляецца рэкляма марачнай прадукцыі і іміджавая рэкляма гандлёвых марак (брэнд-маркетынг).

Другі па значнасьці прыбытковы падзел - платны хостынг. Хостынгавае падпадзяленьне кампаніі — Hoster.by — першым пасьля манапольнага рэгістратара «Адкрыты кантакт» атрымала ліцэнзію на рэгістрацыю дамэнаў у зоне .by.

Невялікія паступленьні таксама прыносяць кампаніі — гандлёвая пляцоўка і sms-сэрвісы.

TUT.BY і грамадзтва[рэдагаваць | рэдагаваць крыніцу]

З 2001 году TUT.BY выступае адным з арганізатараў і фундатараў Беларускага інтэрнэт-форуму. 5—6 кастрычніка 2006 году TUT.BY правёў першую галіновую канфэрэнцыю «Дзелавы Інтэрнэт». Некамэрцыйныя праекты, грамадзкія арганізацыі, музычныя калектывы атрымліваюць бясплатны хостынг на тэхнічнай пляцоўцы парталу.

Статыстыка[рэдагаваць | рэдагаваць крыніцу]

У пачатку 2007 году TUT.BY падышоў з наступнымі вынікамі:

— колькасьць наведваньняў галоўнай старонкі павялічылася да 260-280 тысяч у суткі;
— колькасьць паштовых скрынь павялічылася да 890 000;
— колькасьць беларускіх сайтаў у каталёгу павялічылася і склала 19 000;
— актуальная колькасьць вакансій і рэзюмэ вырасла да 22 000;
— лік паведамленьняў на форуме вырас амаль у 2 разы і склаў 3 000 000, а лік зарэгістраваных карыстальнікаў дасягнуў 59 000.

На 1 чэрвеня 2008 году:

  • колькасьць наведваньняў галоўнай старонкі павялічылася да 300-400 тысяч у суткі
  • лік паведамленьняў на форуме перасягнуў адзнаку ў 5 мільёнаў і склаў каля 5 800 000, а лік зарэгістраваных карыстальнікаў дасягнуў 109 000

На 1 студзеня 2009 году:

  • лік заходаў унікальных наведвальнікаў на тытульную старонку складае 270 000 у суткі, якія ў суме адкрываюць яе 800-900 тыс. раз за дзень;
  • месячная аўдыторыя парталу — больш за 1,2 млн чалавек;
  • лік паведамленьняў на форуме перасягнуў адзнаку ў 6 мільёнаў і зараз складае каля 6 800 000, а лік зарэгістраваных карыстальнікаў дасягнуў 144 000.

Адзін з найболей запатрабаваных падзелаў TUT.BY — Навіны. Штодня рэдактарамі адбіраецца больш за 60 актуальных навін аб жыцьці беларусаў. Колькасьць чытачоў навін перавышае 115 000 у месяц. 18 сьнежня 2007 году лік апублікаваных навін на партале перавысіў 100 000.

Штомесяц звыш за 1 000 000 карыстачоў праводзяць на партале шматлікія гадзіны. Каля 500 000 чалавек робяць гэта штодня. Штомесяц наведвальнасьць партала расьце на 10%, а аб’ём перадаванай інфармацыі (трафік) — на 15%. За гады існаваньня партала карыстачы стварылі больш за 100 тыс. форумаў, захавалі ў больш чым мільёне электронных паштовых скрынь 13 Тбайт лістоў. Штодня на партале рэгіструецца больш за 1000 новых карыстачоў, адпраўляецца і прымаецца каля 1,5 млн паштовых паведамленьняў.

19 сьнежня 2008 году колькасьць наведваньняў галоўнай старонкі партала ўпершыню перавысіла адзнаку ў 700 тысяч (703 318). 26 студзеня 2009 году — 800 тысяч (840 660). 23 сакавіка 2009 году — 900 тысяч (920 610).

Максымальная колькасьць наведваньняў галоўнай старонкі за ўсю гісторыю існаваньня партала: 1 346 724 (1 лістапада 2010).

11 жніўня 2011 г. колькасьць наведвальнікаў дасягнула 3 мільёнаў[5].

Крыніцы[рэдагаваць | рэдагаваць крыніцу]

Вонкавыя спасылкі[рэдагаваць | рэдагаваць крыніцу]