Беларуская рэгіянальная арганізацыя РНЕ
| Беларуская рэгіянальная арганізацыя РНЕ | |
| Лідэр партыі | Андрэй Саковіч |
|---|---|
| Дата заснаваньня | 1994 |
| Штаб-кватэра | Менск |
| Ідэалёгія | антыбеларуская, прарасейская, захадафобія, імпэрыялістычны шавінізм, нацызм (нацыянал-сацыялізм) |
| Колькасьць | 10-30[1] |
| Афіцыйны сайт | www.rne-center.org |
Беларуская рэгіянальная арганізацыя РНЕ — незарэгістраваны грамадзка-палітычны рух у Беларусі. Зьяўляецца рэгіянальным аддзяленьнем Расейскага нацыянальнага адзінства (РНЕ).
Зьмест |
[рэдагаваць] Мэты
Беларускае аддзяленьне РНЕ стаіць на пазыцыях культурна-моўнага расейскага нацызму.
[рэдагаваць] Гісторыя
РНЕ было створана ў жніўні 1990 году. Ініцыятарам яе стварэньня стаў былы электрасьлесар Аляксандар Баркашоў.
Так званае «Беларускае аддзяленьне» зьявілася ў 1994 годзе. 10 траўня 1999 году беларускія баркашоўцы падалі дакумэнты на рэгістрацыю ў Мін'юст Беларусі, але дагэтуль ім у гэтым адмаўляюць. Заснавальнікам «беларускага райху» быў Глеб Самойлаў, якому ў той час было 18 гадоў. 5 жніўня 2000 году ён быў забіты ў сваім пад'езьдзе трыма нажавымі ўдарамі ў грудзі.
Забойца пакуль ня знойдзены. Сьледзтва падазрае, што заказчыкам гэтага злачынства мог быць Валер Ігнатовіч — былы паплечнік Самойлава.
Афіцыйна з 11 лістапада 2001 году арганізацыю ўзначаліў выхадзец з Горадні Андрэй Саковіч, якому ў той час было 28 гадоў.
Найбольш актыўна РНЕ дзейнічае на ўсходзе Беларусі. Улетку 2007 году кіраўніца Віцебскага лялечнага тэатру Вікторыя Дашкевіч атрымоўвала лісты з подпісам РНЕ — з патрабаваньнем перавесьці рэпэртуар на расейскую мову. Дашкевіч накіравала ў сувязі зь лістом скаргу ў праваахоўныя органы, аднак улады адмовіліся распачаць крымінальную справу. Ліставаныя пагрозы ад РНЕ атрымлівалі й журналісты газэты «Витебский куръер».
Надпісы «РНЕ» часта зьяўляюцца ў Курапатах — імі суправаджаліся акты пашкоджаньня мэмарыяльнага ўшанавальнага знаку і лавы Клінтана. Фашыстоўскую свастыку з пазнакай «РНЕ» часта можна ўбачыць і на габрэйскіх могілках, на помніках ахвярам Галакосту.
У чэрвені 2007 году кіраўніца Віцебскага аддзяленьня АГП атрымала ліст ад РНЕ з пагрозай асабістай расправы, калі яна ня спыніць сваю апазыцыйную дзейнасьць. 16 жніўня 2007 актывісты апазыцыйнай Партыі БНФ знайшлі пры ўваходзе ў сядзібу партыі макет выбуховай прылады з эмблемай РНЕ, якая нагадвае свастыку, і з пачкам улётак РНЕ. РНЕ заявіла, што не падкладала макет прылады.[2]
Вядомы толькі адзін выпадак, калі актывіст РНЕ трапіў пад суд: у Гомлі 6 месяцаў зьняволеньня атрымаў нехта Якаўчук, пакараны за ўдзел у незарэгістраванай арганізацыі.
Назіральнікі адзначаюць, што пасьля сьмерці ў 2000 годзе тагачаснага лідэра беларускай філіі РНЕ Самойлава, арганізацыя заняпала. Паводле незалежных крыніц, цяпер у РНЕ ўсяго некалькі дзясяткаў актывістаў.[1]
[рэдагаваць] Крыніцы
[рэдагаваць] Вонкавыя спасылкі
- РНЕ (рас.)
- Інтэрвію Андрэя Саковіча газэце «Народная воля» (рас.)
