Багушэўск

Багушэўск
Герб Багушэўску Сьцяг Багушэўску
Вобласьць:	Віцебская
Раён:	Сеньненскі
Насельніцтва:	3,1 тыс. (2008)
Тэлефонны код:	+375 2135
Паштовы індэкс:	211510
Аўтамабільны код:	2
Геаграфічныя каардынаты:	54°50′49″ пн. ш. 30°12′39″ у. д.
Багушэўск на мапе Беларусі Багушэўск

Багушэ́ўск — мястэчка ў Беларусі. Уваходзіць у склад Сеньненскага раёну Віцебскай вобласьці. Насельніцтва 3,1 тыс. чал. (2008). Знаходзіцца за 38 км на ўсход ад Сянна. Чыгуначная станцыя Багушэўская на лініі Віцебск — Ворша. Аўтамабільныя дарогі злучаюць мястэчка зь Сянном, Віцебскам, Воршай.

Этымалёгія назвы

Тапонім «Багушэўск» утварыўся ад прозьвішча ўладальніка гэтых мясьцінаў пана Багушэўскага, які згадзіўся перадаць частку зямлі пад станцыю, але пры ўмове, што яна атрымае назву ў гонар ягонай жонкі — Багушэўская. У сваю чаргу населены пункт каля станцыі атрымаў назву Багушэўск. Сам Д. Багушэўскі памёр у 1903 і пахаваны ў в. Худалеі (цяпер — в. Рыбнае) пад Багушэўскам.

Гісторыя

Заснаваньне

Першыя жыхары пачалі сяліцца ў гэтай мясцовасьці, дзякуючы «каплічцы Макавея». Каля гэтай каплічкі праходзіла дарога Сянно — Віцебск. У час царкоўных сьвятаў зь Серакаротні (цяпер в. Лучазарнае) да каплічкі прыязджаў сьвятар і на набажэнствы зьбіралася многа сялянаў з навакольных вёсак. Некалькі прадпрыймальных людзей вырашылі пасяліцца тут, каб весьці гандаль. Забароўскі адкрыў карчму, Гозін — заезны дом (гатэль разам з бакалейнай крамай), Рэут — краму. Іх можна лічыць заснавальнікамі Багушэўску. Пазьней тут пасяліліся Ландзёнак, Кулік, Кац, Крывашэеў.

Упершыню Багушэўск згадваецца ў XIX ст. як фальварак.

Храналёгія

• 1854—1884: у фальварку працаваў бровар; галоўным піваварам быў латыш Рэўт.
• 1901: з будаўніцтвам чыгункі Віцебск — Жлобін зьявілася чыгуначная станцыя Багушэўская, вакол якой вырасла мястэчка.
• 1915: у мястэчку збудавалі лесапілку, пачала дзейнічаць сынагога; працавалі 2 фэльчары.
• 17 ліпеня 1924—1931: цэнтар Багушэўскага раёну.
• 1933: у Багушэўску працавалі ільнозавод, кузьня прамысловай арцелі, швацкая майстэрня, мэблевая фабрыка, смоларцель «1-е Траўня», вінзавод (створаны да рэвалюцыі).
• 1935—1960: зноў цэнтар раёну.
• 1938: атрымаў афіцыйны статус пасёлку гарадзкога тыпу.
• ліпень 1941 — 25 чэрвеня 1944: у Другую сусьветню вайну знаходзіўся пад нямецкай акупацыяй.
• 1960: у Сеньненскім раёне

Насельніцтва

• XX стагодзьдзе: 1990 — 5 тыс. чал.
• XXI стагодзьдзе: 2003 — 3660 чал.; 2006 — 3,2 тыс. чал.; 2008 — 3,1 тыс. чал.

Інфраструктура

У Багушэўску працуюць 2 сярэднія і музычная школы, дашкольная ўстанова, лякарня, дом культуры, 2 бібліятэкі, народны тэатар, пошта, АТС.

У мястэчку разьмяшчаецца дом-інтэрнат для дзяцей з асаблівасьцямі псыха-фізычнага разьвіцьця і абласная сухотная лякарня.

Эканоміка

У Багушэўску працуюць мэблевая фабрыка, лясная гаспадарка, леспрамгас, ільнозавод, акцыянэрнае таварыства «Багушэўскмэбля», пашывачны і кандытарскі цэхі, камбінат побытавага абслугоўваньня.

Турыстычная інфармацыя

За 5 км на поўдзень ад Багушэўску пачынаецца Цёмная пушча, у самім мястэчку захаваліся старыя габрэйскія могілкі.

У пач. 1990-х у Багушэўску збудавалі царкву Сьвятых апосталаў Пятра й Паўла.

Вядомыя асобы

• Пётар Абросімаў (1912—2009) — савецкі дыплямат і палітык
• Зінаіда Канапелька (1918—1997) — народная артыстка Беларусі
• Аляксандар Марфіцкі (1956—2009) — беларускі вайсковы лётнік першай клясы; загінуў у час выкананьня фігуры пілятажу на Radom Air Show 2009

Літаратура

• Энцыклапедыя гісторыі Беларусі. У 6 т. Т. 1: А — Беліца / Беларус. Энцыкл.; Рэдкал.: М. В. Біч і інш.; Прадм. М. Ткачова; Маст. Э. Э. Жакевіч. — Мн.: БелЭн, 1993. — 494 с., [8] к.: іл. ISBN 5-85700-074-2.
• Яна Iльіна. Уладзімер Андрэйчанка дапамог вярнуць рэліквію // «Народная Воля» № 162—163, 12 кастрычніка 2006.

Вонкавыя спасылкі

• Прагноз надвор’я ў мяст. Багушэўск
• мяст. Багушэўск на Radzima.org
• Багушэўск на Прыдзвінскі крайн: Гісторыя і сучаснасць
• Багушэўск — парафія Найсвяцейшага Цела i Крыві Хрыста i св. Агнешкі, дзевы i мучаніцы на Catholic.by