Казлоўшчына

Казлоўшчына
Вобласьць:	Гарадзенскай
Раён:	Дзятлаўскі
Насельніцтва:	2,3 тыс. (2008)
Тэлефонны код:	+375 11563
Паштовы індэкс:	231482
Геаграфічныя каардынаты:	53°19′ пн. ш. 25°18′ у. д.
Казлоўшчына на мапе Беларусі Казлоўшчына

Казло́ўшчына — мястэчка ў Беларусі, на рацэ Трыцаўка. Уваходзіць у склад Дзятлаўскага раёну Гарадзенскай вобласьці. Насельніцтва 2,3 тыс. чалавек (2008). Знаходзіцца за 20 км на поўдзень ад места Зьдзецел, за 30 км ад чыгуначнай станцыі Слонім (лінія Баранавічы — Ваўкавыск); на аўтамабільнай дарозе Слонім — Зьдзецел (М11, E11).

Гісторыя

Упершыню Казлоўчына згадваецца ў XVІІІ ст. Мясьціна ўваходзіла ў склад Слонімскага павету Наваградзкага ваяводзтва. Станам на 1773 тут існавала вуніяцкая царква.

У выніку трэцяга падзелу Рэчы Паспалітай (1795) Казлоўчына апынулася ў складзе Расейскай імпэрыі, у Слонімскім павеце Гарадзенскай губэрні. У 2-й пал. XІХ ст. тут заснавалі сядзібу і парк. Паводле вынікаў перапісу (1897) у мястэчку было 42 двары, 2 габрэйскія малітоўныя дамы, народная вучэльня, суконная фабрыка, млын, 11 крамаў і 2 шынкі.

У Першую сусьветную вайну Казлоўшчыну занялі нямецкія войскі. Цягам 1919—1920 мястэчка пераходзіла з рук у рукі ад бальшавікоў да польскага войска. Згодна з Рыскай мірнай дамовай (1921) Казлоўшчына апынулася ў складзе міжваеннай Польскай Рэспублікі, дзе зрабілася цэнтрам гміны Слонімскага павету Наваградзкага ваяводзтва. У гэты час тут было 86 двароў.

У 1939 Казлоўшчына ўвайшла ў БССР, дзе ў 1940 зрабілася цэнтрам раёну (з 1960 у Дзятлаўскім раёне.). У Другую сусьветную вайну з чэрвеня 1941 да 13 ліпеня 1944 мястэчка знаходзілася пад нямецкай акупацыяй. У 1948 паселішча атрымала афіцыйны статус пасёлку гарадзкога тыпу.

Насельніцтва

• XIX стагодзьдзе: 1830 — 49 муж., зь іх шляхты 3, духоўнага стану 1, мяшчанаў-хрысьціянаў і сялянаў 45; 1897 — 325 чал.
• XX стагодзьдзе: 1921 — 467 чал.; 1994 — 1,9 тыс. чал.
• XXI стагодзьдзе: 2006 — 2,4 тыс. чал.; 2008 — 2,3 тыс. чал.

Адукацыя

У Казлоўшчыне працуюць сярэдняя і музычная школы, дашкольная ўстанова.

Мэдыцына

Мэдычныя паслугі надае лякарня.

Культура

Дзейнічаюць 3 бібліятэкі, дом культуры, дом дзіцячай і юнацкай творчасьці.

Эканоміка

Прадпрыемствы дрэваапрацоўчай і харчовай прамысловасьці.

Турыстычная інфармацыя

Выдатныя мясьціны

• Сядзібна-паркавы комплекс (XIX ст.)
• Царква Ўсьпеньня Прасьв. Багародзіцы (пач. ХХ ст.)

Літаратура

• Энцыклапедыя гісторыі Беларусі. У 6 т. Т. 4: Кадэты — Ляшчэня / Беларус. Энцыкл.; Рэдкал.: Г. П. Пашкоў (галоўны рэд.) і інш.; Маст. Э. Э. Жакевіч. — Мн.: БелЭн, 1997. — 432 с.: іл. ISBN 985-11-0041-2.
• Соркіна I. Мястэчкі Беларусі ў канцы ХVІІІ — першай палове ХІХ ст. — Вільня: ЕГУ, 2010.— 488 с. ISBN 978-9955-773-33-7.
• Kozłowszczyzna // Słownik geograficzny Królestwa Polskiego i innych krajów słowiańskich. Tom XV, cz. 2: Januszpol — Wola Justowska. — Warszawa, 1902. S. 150.

Вонкавыя спасылкі

• мяст. Казлоўшчына на Radzima.org

Казлоўшчына ў сучасным адміністрацыйна-тэрытарыяльным падзеле Беларусі