Карачаева-Чаркесія

Карачаева-Чаркесія — суб’ект Расейскай Фэдэрацыя, разьмешчаны на Паўночным Каўказе.

Знаходзіцца ў перадгор’ях паўночнай часткі Вялікага Каўказа. Рэспубліка мяжуе на захадзе з Краснадарскім краем, на поўначы з Стаўрапальскім краем, на ўсходзе — з Кабардына-Балкарскай рэспублікай, на поўдні ўздоўж Галоўнага Каўкаскага хрыбта — з Абхазіяй і Грузіяй. Уключае Карачай, Чаркесію, Абазінію і тэрыторыі, населеныя казакамі ды нагайцамі. Адміністрацыйны цэнтар — места Чаркеск.

Геаграфія і прырода

Найбуйнейшая частка (каля 80%) Карачаева-Чаркескай Рэспублікі разьмешчаная ў горнай мясцовасьці. У межах рэспублікі вылучаюцца 3 зоны: перадгорная раўніна, перадгор’і і горы Каўказа. На поўначы цягнуцца Перадавыя хрыбты Вялікага Каўказа, на поўдні — Водаразьдзельны і Бакавы, іх вышыня дасягае 4000 м. Да ўзьбярэжжа Чорнага мора вядуць Марухскі і Клухорскі перавалы. На мяжы з Кабардына-Балкарыяй ляжыць гара Эльбрус, самая высокая вяршыня Каўказа.

У рэспубліцы шмат водных рэсурсаў: каля 130 высакагорных азёраў, мноства горных вадаспадаў. Працякаюць 172 ракі, з іх самыя буйныя — Кубань, Вялікі і Малы Зелянчук, Уруп, Лаба; маецца Кубанскае вадасховішча. Дзейная ў рэспубліцы сыстэма Вялікага Стаўрапальскага каналу зьяўляецца крыніцай водазабесьпячэньня для Стаўрапальскага края.

Нетры багатыя на карысныя выкапні: каменны вугаль, граніт, мармур, розныя руды і гліны. У вялікіх запасах — лекавыя мінэральныя воды, мноства тэрмальных крыніцаў. Карачаева-Чаркесія разьмешчаная ў зоне горных стэпаў і шырокалісьцевых лясоў. У лясох і на высакагор’і захавалася багатая флёра і фаўна. На тэрыторыі рэспублікі знаходзяцца Тэбэрдзінскі запаведнік і частка Каўкаскага запаведніка.

Насельніцтва

Карачаева-Чаркесія зьяўляецца шматнацыянальнай рэспублікай: на яе тэрыторыі пражываюць прадстаўнікі больш за 80 нацыянальнасьцяў. Агульная колькасьць насельніцтва складае 434,5 тыс. чал.(2005). Шчыльнасьць насельніцтва — 30,8 чал./км², удзельная вага гарадзкога насельніцтва — 44,1%.

Нацыянальны склад: карачаеўцы (38,5%), расейцы (33,6%), чаркесы (11,3%), абазіны (7,4%), нагайцы (3,4%).

Адміністрацыйна-тэрытарыяльны падзел

Рэспубліка падзеленая на 10 раёнаў; налічваецца 144 паселішчы, зь іх — 4 буйныя месты (Чаркеск, Карачаеўск, Усьць-Джэгута і Цэбэрда). Раёны:

• Усьць-Джэгуцінскі
• Зелянчуцкі
• Малакарачаеўскі
• Прыкубанскі
• Хабэскі
• Адыгэ-Хабльскі
• Карачаеўскі
• Урупскі

Вонкавыя спасылкі

 Карачаева-Чаркесія — сховішча мультымэдыйных матэрыялаў

• Афіцыйны сайт Карачаева-Чаркесіі